स्कुटर चोरीमा संलग्न दुई युवक काठमाडौं उपत्यका ट्राफिक प्रहरीको नियन्त्रणमा

काठमाडौं । ट्राफिक प्रहरीले काठमाडौंका छुट्टाछुट्टै स्थानबाट स्कुटर चोरीमा संलग्न रहेको आरोपमा दुई युवकलाई पक्राउ गरेको छ।

काठमाडौं उपत्यका ट्राफिक प्रहरी कार्यालयबाट खटिएको टोलीले स्कुटर चोरीमा संलग्न रहेको आरोपमा सिन्धुपाल्चोकको बाह्रबिसे नगरपालिका- ७ घर भएर हाल काठमाडौंको मनमैजु बस्दै आएका २० वर्षीय शनिस श्रेष्ठ र  रुकुमपूर्वको पुथा उत्तरगंगा गाउँपालिका-१३ घर भई हाल काठमाडौंको मनमैजु बस्ने १८ वर्षीय सुशान्त बुढा मगरलाई पक्राउ गरेको हो।

ट्राफिक प्रहरीले दिएको जानकारी अनुसार उनीहरुलाई चोरी भएको स्कुटरसहित पक्राउ गरेको हो।

पक्राउ परेका दुबै जनालाई थप अनुसन्धानका लागि प्रहरीको जिम्मा लगाइएको काठमाडौं उपत्यका ट्राफिक प्रहरी कार्यालयले जानकारी दिएको छ।

काठमाडौं उपत्यका ट्राफिक प्रहरी कार्यालयमा एसएसपी बिनोद घिमिरेले कमाण्ड सम्हालेयता चोरी भएका सवारीसाधनसँगै चोरीमा संलग्न भएकाहरु धमाधम पक्राउ पर्दै आएका छन् ।