मोटरसाइकल चोरीमा संलग्न युवक ट्राफिक प्रहरीको नियन्त्रणमा

काठमाडौं । ट्राफिक प्रहरीले मोटरसाइकल चोरीमा संलग्न रहेको आरोपमा एक युवकलाई पक्राउ गरेको छ।

उपत्यका ट्राफिक प्रहरी कार्यालयले काठमाडौँ- ६ तिनचुलीबाट आज मोटरसाइकल चोरीमा संलग्न रहेको आरोपमा काभ्रेपलाञ्चोकको तेमाल गाउँपालिका- २ घर भई काठमाडौँको कपन बस्दै आएका १९ वर्षीय प्रकाश तामाङलाई पक्राउ गरेको प्रवक्ता एसपी दिपक गिरीले जानकारी दिएका छन् ।

एसपी गिरीका अनुसार वास्तविक नम्बर प्रदेश ३-०२-०११ प ३६ ९९  रहेको मोटरसाइकलको नम्बर परिवर्तन गरी बागमती प्रदेश ०२-०१५ प ७७ ९८ राखि तामाङले चलाइरहेको अवस्था फेला पारी ट्राफिक प्रहरीले नियन्त्रणमा लिएको हो । उक्त मोटरसाइकल सिन्धुपाल्चोक घर भएका रुकेश आले मगरले यहि वैशाख ५ गते काठमाडौँको नयाँबानेश्‍वर स्थित थापागाउँबाट हराएको भनि काठमाडौँ उपत्यका ट्राफिक प्रहरी कार्यालयमा खोजतलासको लागि निवेदन दिएका थिए ।

चोरीमा संलग्न रहेको आरोपमा पक्राउ परेका  तामाङलाई आवश्यक अनुसन्धानका लागि प्रहरी वृत्त बानेश्‍वर पठाइएको ट्राफिक प्रहरी प्रवक्ता गिरीले बताए।