ट्राफिक प्रहरीले फेला पार्‍यो चोरी भएका २२ वटा दुई पाङ्ग्रे सवारीसाधन

काठमाडौं । ट्राफिक प्रहरीले चोरी भएका २२ वटा दुई पाङग्रे सवारी साधन फेला पारेर सवारी धनीलाई हस्तान्तर गरेको छ।

काठमाडौका विभिन्न स्थानबाट चोरी भएका २२ वटा दुई पाङग्रे सवारी साधन (मोटरसाइकल र स्कुटर) खोजतलासका क्रममा फेला पारेर आज सम्बन्धित धनीलाई हस्तान्तरण गरेको काठमाडौँ उपत्यका ट्राफिक प्रहरी कार्यालयले जानकारी दिएको छ।  काठमाडौँ उपत्यका ट्राफिक प्रहरी कार्यालयमा आयोजित एक कार्यक्रमकाबीच  प्रमुख प्रहरी वरिष्ठ उपरिक्षक विनोद घिमिरेले १६ वटा मोटरसाइकल र ६ वटा स्कुटर सम्बन्धित धनीलाई आज हस्तान्तरण गरेका हुन् ।

काठमाडौँ उपत्यका ट्राफिक प्रहरी कार्यालयमा प्राप्‍त निवेदनका आधारमा खोजी गर्ने क्रममा केही वास्तविक नम्बर प्लेटमा र केही नक्कली नम्बर प्लेट राखेको अवस्थामा काठमाडौँ उपत्यकाको मुलपानी, माकलबारी,सुकेधारा, गौरीघाट, काँडाघारी,नयाँबसपार्क,सोह्रखुट्टे, स्वयम्भु, चौमती, स्युचाटार, दरबारमार्ग, भैंसेपाटी र ठिमी लगायतका स्थानबाट उक्त सवारी साधन ट्राफिक प्रहरीले फेला पारेको थियो । 

आज बुझाइएका २२ वटा सहित ४ सय ३१ वटा सवारी साधन गत साउन महिनादेखी आजका दिनसम्म ट्राफिक प्रहरीले धनीलाई जिम्मा लगाइसकेको छ भने चोरीका ४० वटा दुई पाङ्ग्रे सवारी साधन सहित चोरीमा संलग्न ५८ जना व्यक्तिहरूलाई पनि आवश्यक कारबाहीका लागि  प्रहरीलाई  बुझाइएको प्रहरीले जानकारी दिएको छ ।आज बुझाइएका २२ वटा सवारी साधनहरु हराएको भनि विभिन्न  काठमाडौं उपत्यका ट्राफिक प्रहरी कार्यालयमा निवेदन परेका थिए । 

ट्राफिक प्रहरीले आर्थिक वर्ष २०७९-०८० मा ४ सय ९९ वटा,०८०-०८१ मा ४ सय १७ वटा र ०८१-०८२ को आज सम्ममा ४ सय ३१ वटा दुई पाङ्ग्रे सवारी साधन खोजतलास गरी ट्राफिक प्रहरीले सम्बन्धित धनीलाई जिम्मा लगाएको उपत्यका ट्राफिक प्रहरीले जनाएको छ।