कैलालीका भन्सार प्रमुखलाई कुटपिट गर्ने नगर प्रहरी निरीक्षक धामीसहित ४ जना पक्राउ

कैलाली । कैलाली भन्सार कार्यालयका प्रमुखलाई कुटपिट गर्ने धनगढी उपमहानगरपालिकाका नगर प्रहरी प्रमुखसहित प्रहरीले ४ जनालाई पक्राउ गरेको छ।

शनिबार राति धनगढी भन्सार कार्यालय प्रमुख अनन्तराज तिमिल्सिनालाई कुटपिट गरेको आरोपमा नगर प्रहरी निरीक्षक लक्ष्मणसिंह धामी, नगर प्रहरी सवारी चालक हसनबहादुर मल्ल, नगर प्रहरी जवान जितेन्द्र सिंह धामी र नगर प्रहरी हवल्दार मणीदत्त भट्टलाई पक्राउ गरेको जिल्ला प्रहरी कार्यालय कैलालीले जानकारी दिएको छ।

प्रहरीका अनुसार उनीहरु चारै जनालाई आज धनगढीबाट पक्राउ गरिएको हो। कैलाली प्रहरीले दिएको जानकारी अनुसार भन्सार प्रमुख तिमिल्सिनाले दिएको जाहेरीका आधारमा नगर प्रहरी निरीक्षकसहित ४ जनालाई पक्राउ गरिएको हो।

पक्राउ परेका उनीहरुले शनिबार राति भन्सार कार्यालय प्रवेश गर्दै प्रमुख तिमिल्सिनालाई कुटपिट गरेका थिए। उनीहरुले कुटपिट गरेको सिसीटीभी फुटेज पनि सार्वजनिक भइसकेको छ।

कैलाली प्रहरीले पक्राउ परेका उनीहरुलाई हिरासतमा लिएर घटनाबारे थप अनुसन्धान अगाडि बढाएको जनाएको छ भने भन्सार प्रमुखको सुरक्षाका लागि ४ प्रहरी खटाइएको छ।