मोटरसाइकल चोरीमा संलग्न रहेका ३ जना ट्राफिक प्रहरीको नियन्त्रणमा

काठमाडौं । ट्राफिक प्रहरीले मोटरसाइकल चोरीमा संलग्न रहेको आरोपमा  ३ जनालाई पक्राउ गरेको छ। काठमाडौं उपत्यकाका विभिन्न स्थानबाट ट्राफिक प्रहरीले मोटरसाइकल चोरीमा संलग्न रहेका ३ जनालाईनियन्त्रणमा लिएको काठमाडौं उपत्यका ट्राफिक प्रहरी कार्यालयले जानकारी दिएको छ।

उपत्यका ट्राफिक प्रहरी कार्यालयका अनुसार बागमती प्रदेश ०२-०५५ प ४० ६८ नम्बरको मोटरसाइकल सहित धादिङको गजुरी गाउँपालिका- ७ घर भई हाल काठमाडौंको पशुपती बस्ने २२ वर्षीय सन्तोष कोईराला र सोही स्थानका  २७ वर्षीय सजिर श्रेष्‍ठलाई काठमाडौंको  पशुपतीनाथ मन्दिर नजिकैबाट ट्राफिक प्रहरीले नियन्त्रणमा लिएको काठमाडौं उपत्यका ट्राफिक प्रहरी कार्यालयका प्रवक्ता एसपी दीपक गिरीले जानकारी दिएका छन् ।

उक्त मोटरसाइकल काठमाडौंको बालाजुबाट हराएको भनि गोरखाका सुरज तामाङले काठमाडौं उपत्यका ट्राफिक प्रहरी कार्यालयमा निवेदन दिएको ट्राफिक प्रहरीले जानकारी दिएको छ।

सोमबार पक्राउ परेका दुवै जनालाई आवश्यक अनुसन्धानका लागि प्रहरी वृत्त बालाजुमा पठाइएको  एसपी गिरीले जानकारी दिएका छन। 

यसैगरी काठमाडौंकै गोकर्णेश्‍वर नगरपालिका- ६ बेशीगाउँबाट पनि सोमबार नै बागमती प्रदेश ०२-०२२ प ३४ ४८ नम्बरको मोटरसाइकल सहित काभ्रेपलाञ्चोक घर भई काठमाडौंको जोरपाटी बस्दै आएका ३७ वर्षीय देवराज योञ्जनलाई ट्राफिक प्रहरीले नियन्त्रणमा लिएको हो । प्रवक्ता गिरीका अनुसार  उक्त मोटरसाइकल काठमाडौंको बुढानिलकण्ठबाट हराएको भनि सोलुखुम्बु घर भई हाल काठमाडौंको चाबहिल बस्ने काजी शेर्पाले काठमाडौं उपत्यका ट्राफिक प्रहरी कार्यालयमा निवेदन दिएका थिए ।  

ट्राफिक प्रहरीले  योञ्जनलाई आवश्यक अनुसन्धानका लागि प्रहरी वृत्त बौद्ध पठाइएको एसपी  गिरीले बताए।