चोरी पैठारी गरी ल्याइएका २ वटा कारसहित दुई जना ट्राफिक प्रहरीको नियन्त्रणमा

काठमाडौं । ट्राफिक प्रहरीले चोरी पैठारी गरी ल्याएका दुई वटा कारसहित दुई जनालाई पक्राउ गरेको छ।

काठमाडौँका छुट्टाछुट्टै स्थानबाट गत शुक्रबार ट्राफिक प्रहरीले दुई वटा कारसहित दुई जनालाई नियन्त्रणमा लिएको काठमाडौं उपत्यका ट्राफिक प्रहरी कार्यालयले जानकारी दिएको छ।

ट्राफिक प्रहरीका अनुसार बा १६ च ३१३१ नम्बरको स्वीफ्ट कारसहित रामेछापको दोरम्बा गाउँपालिका -४ घर भई हाल काठमाडौँको जोरपाटी बेशीगाउँ बस्ने ४० वर्षीय धन बहादुर तामाङलाई काठमाडौँको कागेश्‍वरी मनोहरा नगरपालिका ८ शिवचोबाट र  बा १६ च ४० १७ नम्बरको स्वीफ्ट कारसहित सिन्धुलीको गोलन्जोर गाउँपालिका -३ का ३९ वर्षीय मोहन लामालाई काठमाडौँको बौद्धबाट ट्राफिक प्रहरीले नियन्त्रणमा लिएको हो । 

अनुसन्धानको क्रममा दुई वटै कारहरु यातायात ब्यवस्था कार्यालय एकान्तकुना र सम्बन्धित सुजुकी आधिकारीक कम्पनीमा समेत अभिलेखमा रहेको नदेखिएको हुँदा थप अनुसन्धान तथा कारवाहीका लागि त्रिभुवन अन्तर्राष्ट्रिय विमानस्थल भन्सार कार्यालय पठाइएको उपत्यका ट्राफिक प्रहरी कार्यालयका प्रवक्ता प्रहरी उपरीक्षक दिपक गिरीले जानकारी दिएका छन् ।