ट्राफिक प्रहरीले फेला पार्‍यो चोरी भएका २० वटा दुई पाङ्ग्रे सवारी साधन

काठमाडौं । काठमाडौ उपत्यकाबाट चोरी भएका २० वटा दुई पाङ्ग्रे सवारीसाधन फेला पारेर ट्राफिक प्रहरीले सम्बन्धित धनीलाई बुझाएको छ।

उपत्यकाका विभिन्न स्थानबाट चोरी भएका २० वटा मोटरसाइकलर र स्कुटर फेला पारेर सम्बन्धित धनीलाई हस्तान्तरण गरिएको उपत्यका ट्राफिक प्रहरी कार्यालयका प्रवक्ता एसपी दीपक गिरीले जानकारी दिएका छन्  । काठमाडौँ उपत्यका ट्राफिक प्रहरी कार्यालयमा आयोजित एक कार्यक्रमका बिच कार्यालय प्रमुख एसएसपी नवराज अधिकारीले १२ वटा मोटरसाइकल र ८ वटा स्कुटर सम्बन्धित धनीलाई आज हस्तान्तरण गरेका हुन् ।

 काठमाडौँ उपत्यका ट्राफिक प्रहरी कार्यालयमा प्राप्‍त निवेदनका आधारमा खोजी गर्ने क्रममा केही वास्तविक नम्बर प्लेटमा र केही नक्कली नम्बर प्लेट राखेको अवस्थामा  काठमाडौँ उपत्यकाका नरेफाँट, मिलनचोक, सुन्दरीजल, चाबहिल, मध्यबानेश्वर, मालिगाँउ, काडाँघारी, कालिमाटी, अनामनगर, सिंहदरबार, नेपालटार, नयाँबसपार्क, बसुन्धारा र थली लगायतका स्थानबाट उक्त सवारी साधन ट्राफिक प्रहरीले फेला पारेको एसपी गिरीले बताए ।

बुझाइएका २० वटा सहित ४ सय ८० वटा सवारी साधन गत साउन महिनादेखी आजसम्म ट्राफिक प्रहरीले धनीलाई जिम्मा लगाइसकेको छ भने चोरीका ५१ वटा दुई पाङ्ग्रे सवारी साधन सहित चोरीमा संलग्न ७४ जनालाई आवश्यक कारबाहीका लागि विभिन्न प्रहरी परिसर तथा प्रहरी वृत्तमा पठाइएको गिरीले जानकारी दिए।

एसपी गिरीका अनुसार आर्थिक वर्ष २०७९-०८० मा ४९९ वटा, ०८०-०८१ मा ४१७ ओटा र ०८१-०८२को आज सम्ममा ४ सय ८० वटा दुई पाङ्ग्रे सवारी साधन खोजतलास गरी ट्राफिक प्रहरीले सम्बन्धित धनीलाई जिम्मा लगाएको हो ।

सवारी साधन चोरी तथा हराउनबाट रोक्न आफ्नो सवारी साधन सुरक्षित स्थानमा पार्किङ गरी, ह्वील लक, चेन लक, ह्यान्डिल लक, डिस्क लक, लगायत सुरक्षा साइरनहरु जडान गर्न साथै मानिसहरूको आवत-जावत नहुने एकान्त स्थानमा पार्किङ नगर्न  प्रवक्ता गिरीले अनुरोध गरेका छन् ।

सवारी साधन हराएमा ट्राफिक प्रहरीको हटलाईन नम्बर १०३,नेपाल प्रहरीको हटलाईन नम्बर १०० मा फोन गर्न र नजिकको प्रहरी कार्यालयमा निवेदन दिन सकिने गिरीले  जानकारी दिएका छन् ।