झापामा ९५ जनाको दुर्घटनामा मृत्यु, ५२ हजार चालकलाई कारबाही

काठमाडौं । आर्थिक वर्ष २०८१-०८२ मा झापामा १२ सय ९६ सवारी दुर्घटनामा ९५ जनाको मृत्यु भएको छ। दुर्घटनामा २ हजार जना घाइते भएको जिल्ला ट्राफिक प्रहरी कार्यालय झापाले जानकारी दिएको छ।

झापा ट्राफिक प्रहरीले दिएको जानकारी अनुसार गत साउनदेखि असार अन्तिमसम्ममा भएका ती दुर्घटनाम १३९ जना गम्भीर घाइते हुँदा १९३४ जना सामान्य घाइते भएका हुन् ।

आ.व.२०८१-०८२ को अन्तिमसम्ममा ट्राफिक नियम उल्लंघन गरेर सवारी साधन चलाएका ५२ हजार ८७५ जना चालकलाई कारबाही गरिएको झापा ट्राफिक प्रहरी कार्यालयले जानकारी दिएको छ। कारबाही अन्तर्गत ट्राफिक प्रहरीले ३१७४ चालकलाई मापसे कारबाही गरेको हो।

जसबाट ट्राफिक प्रहरीले ३ करोड ९५ लाख ५५ हजार ५६० रुपैयाँ  राजस्व संकलन गरेको हो। उक्त अवधिमा ट्राफिक प्रहरीले हजारौं सर्वसाधारणलाई ट्राफिक सचेतना कक्षा दिएको थियो।