किन भएको थियो सिरहा कारागारमा झडप र कास्की कारागारमा लफडा?

काठमाडौं ।  । सिरहा र कास्की जिल्ला कारागारमा झ्डप भएको छ।  कारागारकाको नाइके तोक्ने विषयमा सिरहा मुकामस्थित जिल्ला कारागारमा कैदीबन्दीहरूबीच झडप हुँदा १३ जना घाइते भएका छन्। कारागारभित्र आन्तरिक प्रशासनको नाइके तोक्ने विषयमा विवाद चर्किएपछि यो झडप भएको हो।

आइतबार दिउँसो नाइके को हुने भन्ने विवादले दुई समूहबीच झडप भएको हो। घाइतेहरूलाई प्रादेशिक अस्पताल सिरहा पठाइए पनि सुरक्षाका दृष्टिकोणले पनि थप उपचारका लागि उनीहरूलाई आइतबार साँझ  काठमाडौँ ल्याइएको छ।

सिराहा कारागार १५० कैदीबन्दी राख्ने क्षमताको भए पनि हाल ४५८ जना कैदीबन्दी राखिएको छ। क्षमताभन्दा तीन गुणा बढी कैदीबन्दी राखिँदा आन्तरिक व्यवस्थापनमा समस्या देखिएको हो।

शनिबार मात्रै जिल्ला प्रशासन कार्यालयको नेतृत्वमा नेपाल प्रहरी, सशस्त्र प्रहरी र राष्ट्रिय अनुसन्धानको संयुक्त टोलीले कारागार अनुगमन गरेको थियो। अनुगमनका क्रममा कुनै असहज अवस्था नरहेको बताइएको थियो। त्यसको भोलिपल्टै झडप हुनुले कारागार व्यवस्थापनमाथि गम्भीर प्रश्न उठाएको छ।

यसअघि पनि कारागारभित्र आपराधिक गतिविधि भएको आरोपमा छानबिन समिति गठन गरिएको थियो। डेढ महिनाअगाडि बुझाइएको उक्त प्रतिवेदन हालसम्म सार्वजनिक गरिएको छैन।

त्यसैगरी कास्की कारागारमा नयाँ चौकीदार नियुक्तिको विषयले जिल्ला कारागार कास्कीमा तनाव भएको छ ।

कारागारमा रहेका तीनमध्ये ‘क’ ब्लकमा नयाँ चौकीदारमा अजय गुरुङ नियुक्त भएपछि असहमति जनाउँदै कैदीबन्दीले आइतबार लफडा गरेपछि तनाव भएको थियो । 

जिल्ला प्रशासन कार्यालय कास्कीले चौकीदारका लागि अजयसहित, प्रकाश गुरुङ र प्रशान्त थापा जनाको नाम सिफारिस गरेकामा कारागार विभागले गुरुङलाई नियुक्त गरेको थियो । कैदीबन्दीले पूरानै चौकीदार प्रविन गुरुङलाई नियुक्त गर्न माग गर्दै नाराबाजी गरेका थिए । 

प्रत्येक वर्ष साउनमा चौकीदार नाइके नियुक्ति गर्ने गरिएको छ । चौकीदार नियुक्तिमा विभिन्न स्वार्थ जोडिएको कैदीबन्दीको आरोप छ ।  कैदीबन्दीले नाराबाजी गरेपछि कारागारमा सुरक्षा व्यवस्था कडा पारिएको प्रहरीले जनाएको छ । 

कारागार प्रमुख राजेन्द्र शर्माले आन्तरिक चौकीदार नियुक्तिको विषयमा सामान्य विरोध भएको भन्दै स्थिति नियन्त्रणमा रहेको र छलफलबाट समाधानको प्रयास भइरहेको बताए ।कारागारमा ब्लक ‘ए’ मा ४ सय ६६, ब्लक ‘बी’ मा ४ सय ८० र महिला ब्लकमा ३५ जना कैदीबन्दी छन् ।