सीमा अपराध तथा अवैध चोरीपैठारी नियन्त्रणमा गम्भीर भएर लाग्न दुई जिल्लाका सुरक्षा प्रमुखलाई निर्देशन

काठमाडौं  । गृहमन्त्री रमेश लेखकले  मधेस प्रदेशका दुई जिल्ला बारा र  पर्साको शान्ति सुरक्षासहित समग्र अवस्थाबारे सुरक्षा निकायका प्रमुखहरूसँग छलफल गरेका छन् ।  जिल्ला प्रशासन कार्यालय पर्सामा आज आयोजित सुरक्षा समितिको बैठकमा गृहमन्त्री लेखकले दुई जिल्लाका सुरक्षा समितिसँग जिल्लाको समग्र अवस्थाको बारेमा छलफल गरेका हुन् । 

गृहमन्त्री लेखकलाई जिल्लामा हुने धार्मिक गतिविधि, सीमा अपराध, लागुऔषध कारोबार र राजश्व चुहावटको अवस्थाबारे पर्साका प्रजिअ तोयनारायण सुवेदीसहितका बारा र पर्साका सुरक्षा निकायका प्रमुख तथा राजश्व र भन्सार कार्यालयका प्रतिनिधिले सुरक्षाबारे ब्रिफिङ गरेका थिए । 

गृहमन्त्री लेखकले सबै सुरक्षा प्रमुखहरूलाई शून्य सहनशीलतामा काम गर्न निर्देशन दिएका हुन् ।  तीन दिनका लागि वीरगन्ज आइपुगेका गृहमन्त्री लेखकले भारतीय नम्बर प्लेटका सवारी साधनलाई चेकजाँचको बहानामा अनावश्यक दुःख नदिन समेत सुरक्षा निकायका प्रमुखहरूलाई निर्देशन दिए । 

‘गृहमन्त्रीज्यूले सबै कार्यालयका प्रमुखज्यूहरूसँग ब्रिफिङ लिनुभयो, त्यसपछि कडा रूपमा सीमा अपराध, चोरी तस्करी र राजश्व चुहावट रोकथामका लागि निर्देशन दिनुभयो ।’  एक सहभागी  सुरक्षा प्रमुखले बताए।

साथै बारा र पर्सामा धार्मिक सहिष्णुता अपनाएर गम्भीरताका साथ काम गर्न समेत गृहमन्त्री लेखकले निर्देशन दिएको बैठकमा सहभागी एक अधिकारीले जानकारी दिए ।

बैठकमा कानुनमन्त्री अजयकुमार चौरसिया, खानेपानी मन्त्री प्रदीप यादवसहित नेपाल प्रहरी, सशस्त्र प्रहरी, भन्सार कार्यालय, राजश्व विभागका प्रमुखहरूको सहभागिता थियो ।