मोटरसाइकल चोरीमा संलग्न युवक ट्राफिक प्रहरीको नियन्त्रणमा

काठमाडौं । ट्राफिक प्रहरीले मोटरसाइकल चोरीको आरोपमा एक युवकलाई नियन्त्रणमा लिएको छ।

काठमाडौंको गोकणेश्वर नगरपालिका ४ माकलबारी रत्नचोकबाट  मोटरसाकल चोरीमा संलग्न एक युवकलाई ट्राफिक प्रहरीले नियन्त्रणमा लिएको हो ।नियन्त्रणमा आउनेमा सिन्धुपाल्चोकको जुगल गाउँपालिका ३ घर भई हाल काठमाडौंको माकलबारी बस्ने २३ वर्षीय सोनाम दावा शेर्पा रहेका छन् । 

वास्तविक नम्बर बागमती प्रदेश ०२- ०५३ प २८१०  रहेको मोटरसाइकलको  नम्बर परिवर्तन गरी बागमती प्रदेश ०२-०४५ प ६४०३ राखि चलाइरहेको अवस्था फेला पारी शेर्पालाई ट्राफिक प्रहरीले नियन्त्रणमा लिएको हो । 

उक्त मोटरसाइकल रामेछाप घर भएका  पदम बहादुर थापा मगरले भक्तपुरको मध्यपुर ठिमी नगरपालिका १ लोकन्थलीबाट हराएको भनि काठमाडौँ उपत्यका ट्राफिक प्रहरी कार्यालयमा खोजतलासको लागि निवेदन दिएका थिए । 

मोटरसाइकल सहित नियन्त्रणमा आएका उनलाई आवश्यक अनुसन्धानका लागि प्रहरी वृत्त ठिमी, भक्तपुर पठाइएको काठमाडौँ उपत्यका ट्राफिक प्रहरी कार्यालयका प्रवक्ता  प्रहरी उपरीक्षक दिपक गिरीले जानकारी दिए ।