'विभिन्न अभावसँग जुध्दै सुरक्षित यात्राका लागि खटिरहन ट्राफिक प्रहरी प्रतिबद्ध छ'

काठमाडौँ । चाडपर्व लक्षित सुरक्षा सचेतनाको लागिउपत्यका ट्राफिक प्रहरी कार्यालय आज ट्राफिक वाक कार्यक्रम गरेको छ। 

काठमाडौँ महानगर प्रहरी बल समेत सहभागी वाकमा चाडपर्व लक्षित सुरक्षा सचेतनाको लागि विभिन्न जनचेतना मूलक प्ले कार्ड सहित ट्राफिक वाक कार्यक्रम आयोजना गरिएको उपत्यका ट्राफिक प्रहरी कार्यालयले जानकारी दिएको छ।

ट्राफिक प्रहरी कार्यालयका अनुसार  उपत्यका प्रहरी कार्यालय रानीपोखरीबाट सुरु भएको र्‍याली उपत्यका ट्राफिक प्रहरी कार्यालय पगेर समापन भएको थियो।

कार्यक्रमलाई सम्बोधन गर्दै उपत्यका प्रहरी कार्यालयका प्रमुख प्रहरी एआईजी दान बहादुर कार्कीले चाडपर्वलाई सुरक्षित र दुर्घटनारहित बनाउनका लागि ट्राफिक नियमको पालना गरेर सभ्य समाजको निर्माण गर्न सबै प्रतिबद्ध हुनुपर्ने बताए । 

कार्यक्रमका हृदयरोग विशेषज्ञ डा. ओममुर्ति अनिलले देशको वर्तमान परिवेशमा पनि चाडपर्वको समयमा यस्तो कार्यक्रम आयोजना गरिनु समाजका लागि प्रशंसनीय रहेको बताएका थिए ।  साथै उनले चाडपर्वको बहानामा कोही कसैले पनि मादक पदार्थ सेवन गर्ने, तीब्र गतिमा सवारी गुडाउने तथा लागूपदार्थको सेवन गर्ने कार्य गर्नु हानिकारक हुने कुरामा जोड दिए  ।

उपत्यका ट्राफिक प्रहरी कार्यालयका प्रमुख एसएसपी नवराज अधिकारीले अहिलेको  परिस्थितिमा विभिन्न अभावसँग जुध्दै ट्राफिक व्यवस्थापनमा खटिरहेको र सडक प्रयोगकर्ताको सुरक्षित यात्राका लागि ट्राफिक प्रहरी प्रतिबद्ध रहेको बताए । 

कार्यक्रममा जनपद प्रहरी, ट्राफिक प्रहरी, काठमाडौँ महानगर प्रहरी बलका पदाधिकारी, उपत्यका भित्रका सामुदायिक प्रहरी र सञ्चारकर्मीको उपस्थिति रहेको थियो ।