लुटिएका सामान फिर्ता गरिदिए कारबाही गर्दैनौं :ट्राफिक प्रहरी

काठमाडौं । गत भदौ २४ गते जेनजी प्रदर्शनका क्रममा लुटिएक सामानहरु फिर्ता ल्याइदिन  काठमाडौं उपत्यका ट्राफिक प्रहरी कार्यालयले आग्रह गरेको छ।

प्रदर्शनका क्रममा ट्राफिक प्रहरी कार्यालयका कतिपय सामानहरु जलेका थिए भनेकतिपय सामानहरु लुटिएका थिए। ट्राफिक प्रहरीले लुटिएका सामानहरु फिर्ता ल्याइदिन आग्रह गर्दै आएको छ।

उपत्यका ट्राफिक प्रहरी कार्यालयबाटै पनि ल्यापटप, गोप्रो क्यामेरा, ड्रोन, बडी वर्न क्यामेरा, मोबाइल, ब्रेथलाइजर, लिडार गन लगायतका सामानहरू आन्दोलनका क्रममा लगेको ट्राफिक प्रहरीको अनुमान छ।ती सामानहरू अहिलेसम्म भेटिएका छैनन्। फिर्ता दिँदा कारबाहीमा पर्ने डरले नल्याएको हुनसक्ने उपत्यका ट्राफिक प्रहरी कार्यालयको एसपी नरेशराज सुवेदीले जानकारी दिएका छन् ।

जले भनेका मोटरसाइकलहरू सडकमा देखिएका छन्, त्यसैले ट्राफिक प्रहरीको सामाग्रीहरू पनि लगेका छन् कि भन्ने लागेको हो,'उनले भने,'ट्राफिक प्रहरीको सामान फिर्ता ल्याइदिनुहोस्, हामी कारबाही गर्दैनौं।'

उनका अनुसार कतिपयले सामान ल्याइदिँदा कारबाही परिन्छ कि भन्ने डरले नल्याएको भए प्रहरीले कारबाही नगर्ने बताएका छन्।'बडीवर्न क्यामेरा, लिडार गनहरू एकदमै महँगो हुने र सर्वसाधारणका लागि उपयोगी पनि हुँदैन,' उनले भने। ती सामान ल्याएर सम्मानका साथ प्रहरीलाई बुझाउन सकिने एसपी सुवेदीले बताए ।