चोरीको मोटरसाइकल सवार दाङका हरिसहित दुई जना ट्राफिक प्रहरीको नियन्त्रणमा

काठमाडौँ । ट्राफिक प्रहरीले मोटरसाइकल चोरीमा संलग्न रहेका दुई युवकलाई नियन्त्रणमा लिएको छ। उपत्यका ट्राफिक प्रहरी कार्यालय काठमाडौंले चोरीको मोटरसाइकलसहित मकवानपुरका ३२ वर्षीय सरोज लामा  र दाङका १९ वर्षीय हरि मगरलाई पक्राउ गरेको जानकारी दिएको छ।

ट्राफिक प्रहरीले उनीहरुलाई चोरी भएको बा ६६ प ५६८३ नम्बरको मोटरसाइकल प्रयोग गरिरहेको अवस्थामा  काठमाडौँ महानगरपालिका- ४ हिमाल डेन्टल हस्पिटल अगाडिबाट पक्राउ गरेको हो।

उपत्यका ट्राफिक प्रहरीले दिएको जानकारी अनुसार अविनाश पुजारीले उक्त मोटरसाइकल बूढानीलकण्ठ नगरपालिका-११ लसुनटारबाट हराएको भन्दै ट्राफिक प्रहरी कार्यालयमा खोजतलासका लागि निवेदन दिएका थिए।

चोरी भएको मोटरसाइकलसहित शुक्रबार पक्राउ परेका दुई युवकलाई आबश्यक कारबाही तथा अनुसन्धानका लागि प्रहरी वृत्त बौद्ध पठाइएको उपत्यका ट्राफिक प्रहरी कार्यालय काठमाडौंले जानकारी दिएको छ।