बाँकेमा ट्राफिक प्रहरीको अभियान: १०५ सवारीसाधनका नम्बर प्लेट पुनर्लेखन

नेपालगन्ज । जिल्ला ट्राफिक प्रहरी कार्यालय बाँके तथा यसको मातहतका ट्राफिक कार्यालयहरूले सञ्चालन गरिको “सार्वजनिक तथा निजी सवारीसाधनहरूमा अस्पष्ट नम्बर प्लेट पुनर्लेखन गर्ने विशेष कार्यक्रम” प्रभावकारी बन्दै गएको छ। कार्यक्रमअन्तर्गत हालसम्म १०५ वटा सवारीसाधनका नम्बर प्लेट स्पष्ट र विधिसम्मत रूपमा पुनर्लेखन गराइएको जिल्ला ट्राफिक प्रहरी कार्यालय बाँकेले जानकारी दिएको छ।

बाँके ट्राफिक प्रहरी कार्यालयका अनुसार नियमित अनुगमनका क्रममा धेरै सवारीसाधनमा मेटिँदै गएको, फिका देखिने, ढुसी लागेको, वा नियमविपरीत ढङ्गले लेखिएको नम्बर प्लेटमा समस्या देखिएको थियो। यसले सवारीसाधन पहिचान, निगरानी, तथा दुर्घटना रोकथाममा चुनौती थपिने भएकाले विशेष अभियान सञ्चालन गरिएको हो।

अभियानका क्रममा चालक तथा सवारीधनीलाई ट्राफिक नियम, नम्बर प्लेटको महत्त्व र यसको कानुनी जिम्मेवारीबारे विस्तृत रूपमा जानकारी गराइनुका साथै चालकलाई आगामी दिनमा यस्तो समस्या नदोहर्याउन सचेत बनाइएको हो।

जिल्ला ट्राफिक प्रहरी कार्यालय बाँकेले “नम्बर प्लेट स्पष्ट हुनु केवल कानुनको पालना मात्र नभई सडक सुरक्षासँग प्रत्यक्ष सम्बन्धित विषय हो। पुनर्लेखन अभियानले दुर्घटना नियन्त्रण, अपराध रोकथाम र सवारीसाधन व्यवस्थापनमा ठूलो सहयोग पुर्‍याउनेछ।”

आगामी दिनमा पनि यो कार्यक्रम निरन्तर जारी राख्दै अझ धेरै सवारीसाधनलाई व्यवस्थित बनाउने तयारी कार्यालयले गरेको छ। साथै, आवश्यक परे जनचेतनामूलक कार्यक्रम तथा मोबाइल जाँच टोलीसमेत परिचालन गरिने बाँके ट्राफिक प्रहरी कार्यालयले जनाएको छ।