ट्राफिक प्रहरीले फेला पार्‍यो चोरी भएका ६० वटा दुईपाङ्ग्रे सवारी साधन, बुझायो सवारी धनीलाई

काठमाडौँ । काठमाडौँ उपत्यकाका विभिन्न स्थानबाट चोरी भएका ६० वटा दुईपाङ्ग्रे सवारी साधन (मोटरसाइकल र स्कुटर) खोजतलास गरी काठमाडौँ उपत्यका ट्राफिक प्रहरी कार्यालयले आज सम्बन्धित धनीलाई हस्तान्तरण गरेको छ।

काठमाडौँ उपत्यका प्रहरी कार्यालयमा आयोजित कार्यक्रममा काठमाडौँ उपत्यका प्रहरी कार्यालयका प्रमुख प्रहरी अतिरिक्त महानिरीक्षक ईश्वर कार्की र काठमाडौँ उपत्यका ट्राफिक प्रहरी कार्यालयका प्रमुख प्रहरी वरिष्ठ उपरीक्षक नवराज अधिकारीले संयुक्त रूपमा ३४ वटा मोटरसाइकल र २६ वटा स्कुटर धनीलाई जिम्मा लगाएका हुन् ।

ट्राफिक प्रहरी कार्यालयमा प्राप्त निवेदनका आधारमा गरिएको खोजतलासका क्रममा केही सवारी साधन वास्तविक नम्बर प्लेट र केही नक्कली नम्बर प्लेट प्रयोग गरिएको अवस्थामा काडाँघारी, पुल्चोक, स्वयम्भू, दरबारमार्ग, चापागाँउ, नेपालटार, टोखा, नयाँबसपार्क, बालकुमारी, भाटभटेनी, भक्तपुर, लोकन्थली, नाला, बनेपा, बसन्तपुर, किर्तिपुर, ताथली, बौद्ध, सिनामंगल, थानकोट, सोह्रखुट्टे, कपन, सुडाल र जरङ्खु लगायतका स्थानबाट फेला पारिएको ट्राफिक प्रहरीले जनाएको छ।
आज हस्तान्तरण गरिएका ६० वटा सहित गत साउनयता ट्राफिक प्रहरीले जम्मा १८१ वटा सवारी साधन सम्बन्धित धनीलाई जिम्मा लगाइसकेको छ। यसैगरी चोरीका १३ वटा दुईपाङ्ग्रे सवारी साधनसहित चोरीमा संलग्न २५ जना व्यक्तिलाई नियन्त्रणमा लिई आवश्यक कारबाहीका लागि सम्बन्धित प्रहरी परिसर तथा प्रहरी वृत्तमा पठाइएको छ।

सवारी साधन फिर्ता पाएपछि धनीहरूले खुसी व्यक्त गर्दै सामूहिक रूपमा ट्राफिक प्रहरीलाई धन्यवाद दिएका थिए। ट्राफिक प्रहरीका अनुसार आर्थिक वर्ष २०८०/०८१ मा ४१७ वटा र आर्थिक वर्ष २०८१/०८२ मा हालसम्म ५०३ वटा दुईपाङ्ग्रे सवारी साधन खोजतलास गरी धनीलाई जिम्मा लगाइसकिएको छ।

सवारी साधन चोरी तथा हराउने घटनाबाट बच्न काठमाडौँ उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेश राज सुवेदीले सुरक्षित स्थानमा पार्किङ गर्न, ह्वील लक, चेन लक, ह्यान्डिल लक, डिस्क लक तथा सुरक्षा साइरन जडान गर्न र मानिसको आवत–जावत नहुने एकान्त स्थानमा सवारी साधन पार्किङ नगर्न अनुरोध गरेका छन् ।

सवारी साधन हराएमा ट्राफिक प्रहरीको हटलाइन नम्बर १०३, नेपाल प्रहरीको हटलाइन नम्बर १०० मा फोन गर्न वा नजिकको प्रहरी कार्यालयमा निवेदन दिन सकिने जानकारी दिइएको छ।