ट्राफिक प्रहरीलाई घिसार्दै फरार भएका जिप चालक प्रहरीको नियन्त्रणमा

मकवानपुर । मादक पदार्थ सेवन (मापसे) चेकजाँचका क्रममा ट्राफिक प्रहरीलाई घाइते बनाउँदै फरार भएका कार चालकलाई प्रहरीले पक्राउ गरेको छ।पक्राउ पर्नेमा हेटौंडा उपमहानगरपालिका–५, गर्दोईका ४६ वर्षीय बासुदेव आचार्य रहेका छन्।

जिल्ला ट्राफिक प्रहरी कार्यालय मकवानपुरका अनुसार बिहीबार राति करिब पौने ८ बजे हेटौंडा उपमहानगरपालिका–११ थानाभर्‍याङ क्षेत्रमा नियमित मापसे चेकजाँच भइरहेको थियो। सोही क्रममा नवलपुरबाट हेटौंडा बजारतर्फ आउँदै गरेको एक कारलाई ट्राफिक प्रहरीले रोकेको थियो।

चेकजाँचका लागि ब्रेथलाइजर प्रयोग गर्न खोज्दा चालकले अचानक कारको सिसा बन्द गरी गाडी अगाडि बढाएका थिए। उक्त क्रममा ब्रेथलाइजर समातेका एक ट्राफिक प्रहरी जवान कारमा अड्किएर करिब १० मिटर घिसारिँदा घाइते भएका थिए।

घटनापछि फरार रहेका चालक र कारको खोजी तीव्र पारिएको प्रहरीले जनाएको छ। खोजतलासका क्रममा शुक्रबार चितवनको भरतपुरबाट बा ६ च ८४०९ नम्बरको कारसहित चालक आचार्यलाई नियन्त्रणमा लिएर मकवानपुर प्रहरीले सार्वजनिक गरेको हो।

घटनाका विषयमा आवश्यक कानुनी प्रक्रिया अघि बढाइएको र थप अनुसन्धान भइरहेको प्रहरीले जनाएको छ।