जुरीखेत सुमो दुर्घटना: मृतक ६ मध्ये ४ जनाको पहिचान खुल्यो,२ जना भारतका

काठमाडौं  । सुमो दुर्घटनाले ६ जनाको ज्यान लिएको छ। काठमाडौंबाट हेटौँडातर्फ जाँदै गरेको ना १ ज १७७८ नम्बरको सुमो भीमफेदी–कुलेखानी सडकखण्डमा दुर्घटनाग्रस्त भएको थियो। भीमफेदी गाउँपालिका–६ जुरीखेतमा आइतबार साँझ भएको दुर्घटनाका ६ मृतकमध्ये चार जनाको पहिचान खुलेको छ।

जिल्ला प्रहरी कार्यालय मकवानपुरका अनुसार  ज्यान गुमाउनेमा पहिचान खुल्नेमा भारतको बिहारस्थित पटनाका ४२ वर्षीय रजनीश कुमार र बेगुसरायका ५० वर्षीय रविन्द कुमार रहेका छन्। यस्तै, हेटौँडा–४ कमलडाँडाकी ४० वर्षीया सविता लम्साल तथा हेटौँडा–२ कान्तिराजपथका २९ वर्षीय निखिल अग्रवालको पनि मृत्यु भएको पुष्टि गरिएको छ।

दुर्घटनामा मृत्यु भएका अन्य दुई जना पुरुषको भने पहिचान हुन बाँकी छ। अन्दाजी ३५ र ४० वर्ष उमेरका देखिने उनीहरूको नाम र ठेगाना पत्ता लगाउने कार्य भइरहेको प्रहरी नायब उपरीक्षक पुष्कर बोगटीले जानकारी दिए।

यसै दुर्घटनामा सुमो चालकसहित तीन जना घाइते भएका छन्। घाइतेमध्ये हेटौँडा–४ का ४५ वर्षीय चालक गणेश थापा र १२ वर्षीय अभ्यास लम्सालको अवस्था गम्भीर रहेको छ भने रौतहटकी २१ वर्षीया रिचा चौधरीको अवस्था मध्यम रहेको प्रहरीले जनाएको छ।

घाइतेहरूको भरतपुरस्थित चितवन मेडिकल कलेजमा उपचार भइरहेको छ। दुर्घटनाको कारणबारे थप अनुसन्धान भइरहेको प्रहरीले जनाएको छ।