अर्धनग्न अवस्थामा खोलामा भेटियो महिलाको शव

काठमाडौं । कञ्चनपुरको भीमदत्त नगरपालिका क्षेत्रमा अर्धनग्न अवस्थामा एक युवतीको शव फेला परेको छ।

 नगरपालिका–१० अन्तर्गत पर्ने तिल्केनीस्थित शान्ति सामुदायिक वनभित्र बग्ने बंग्यादोल खोलामा अन्दाजी २५ वर्ष उमेरकी, हालसम्म पहिचान हुन नसकेको युवती मृत अवस्थामा भेटिएको प्रहरीले जानकारी दिएको छ।

प्रहरीका अनुसार युवतीको शव अर्धनग्न अवस्थामा रहेको थियो। जिल्ला प्रहरी कार्यालय कञ्चनपुरका प्रहरी निरीक्षक वीरेन्द्र थापाले घटनास्थलबाट शव उठाएर महाकाली प्रादेशिक अस्पतालमा सुरक्षित राखिएको जानकारी दिए।

शव केही समयदेखि पानीमा परेकाले सड्न थालेको र त्यसका कारण पहिचान गर्न कठिनाइ भइरहेको प्रहरीको भनाइ छ। घटनाको कारण र मृतकको पहिचान खुलाउने प्रयाससहित थप अनुसन्धान अगाडि बढाइएको प्रहरीले जनाएको छ।