चोरीको मोटरसाइकलसहित युवक ट्राफिक प्रहरीको नियन्त्रणमा

काठमाडौं । मोटरसाइकल चोरीमा संलग्न एक युवकलाई ट्राफिक प्रहरीले चोरीको मोटरसाइकलसहित नियन्त्रणमा लिएको छ।

आज बागमती प्रदेश ०२–०२९ प २५९९ नम्बरको मोटरसाइकल चोरी गरी नम्बर परिवर्तन गरेर चलाइरहेको अवस्थामा भक्तपुरको सुर्यविनायक नगरपालिका-८ बाट सोही सूर्यविनायक नगरपालिका–८ बस्ने २६ वर्षीय युवक समिर त्वाटीलाई ट्राफिक प्रहरीले नियन्त्रणमा लिएको हो। चोरी गरिएको मोटरसाइकलमा बागमती प्रदेश ०२–०३३ प १२८७ नम्बरको प्लेट जडान गरी चलाइरहेको अवस्थामा उनलाई पक्राउ गरिएको ट्राफिक प्रहरीले जनाएको छ।

उक्त मोटरसाइकल काठमाडौँ महानगरपालिका–४ धुम्बाराहीबाट हराएको भन्दै सर्लाहीको कविलासी नगरपालिका–२ घर भएका प्रकाश सिंहले काठमाडौँ उपत्यका ट्राफिक प्रहरी कार्यालयमा खोजतलासका लागि निवेदन दिएका थिए। सोही निवेदनका आधारमा खोजतलास गर्दै जाँदा ट्राफिक प्रहरीले मोटरसाइकलसहित त्वाटीलाई नियन्त्रणमा लिन सफल भएको हो।

मोटरसाइकलसहित नियन्त्रणमा लिएका समिर त्वाटीलाई आवश्यक अनुसन्धानका लागि प्रहरी वृत्त महाराजगञ्ज पठाइएको काठमाडौँ उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेश राज सुवेदीले जानकारी दिए।

प्रहरी उपरीक्षक सुवेदीले सवारी चोरीबाट बच्न सवारी साधन सुरक्षित स्थानमा पार्किङ गर्न, ह्विल लक, चेन लक, ह्यान्डिल लक, डिस्क लक तथा सुरक्षा साइरन जडान गर्न अनुरोध गर्नुभएको छ। साथै, मानिसको आवत–जावत नहुने एकान्त स्थानमा सवारी पार्किङ नगर्न पनि उहाँले आग्रह गरेका छन् ।

हराएका सवारी साधनको खोजतलास र चोरी नियन्त्रण कार्य निरन्तर जारी रहे पनि सवारी धनी स्वयं सजग भई सुरक्षित स्थानमा सवारी पार्किङ गर्नुपर्नेमा प्रहरीले जोड दिएको छ। सवारी साधन हराएमा ट्राफिक प्रहरीको हटलाइन नम्बर १०३ तथा नेपाल प्रहरीको हटलाइन नम्बर १०० मा तत्काल सवारीको विवरणसहित जानकारी गराउन र नजिकको प्रहरी कार्यालयमा निवेदन दिन सकिने प्रहरीले जनाएको छ।