पारिवारिक विवादले भयावह रूप: कान्छी आमाको हत्या, बहिनी गम्भीर घाइते

काठमाडौं ।  पारिवारिक विवादले भयावह रूप लिएको छ। कञ्चनपुरको   दोधारा चाँदनी नगरपालिका–४ स्थित माननीय चोकमा एक व्यक्तिले आफ्नै परिवारमाथि आक्रमण गर्दा एक जनाको ज्यान गएको छ भने अर्की गम्भीर घाइते भएकी छन्।

प्रहरीका अनुसार चैत ३ गते राति करिब ८:४५ बजे ५५ वर्षीय हरि प्रसाद श्रेष्ठले धारिलो हतियार प्रयोग गर्दै आफ्नी ७५ वर्षीया कान्छी आमा बिन्द्रा श्रेष्ठमाथि आक्रमण गरेका थिए। उक्त आक्रमणबाट बिन्द्राको घटनास्थलमै मृत्यु भएको पुष्टि भएको छ।

घटनाकै क्रममा उनले आफ्नी ५० वर्षीया बहिनी भगवती देवी माझीमाथि पनि प्रहार गरेका थिए। टाउको र दाहिने हातमा गहिरो चोट लागेकी भगवतीको अवस्था गम्भीर रहेको छ। उनी हाल महेन्द्रनगरस्थित महाकाली प्रादेशिक अस्पतालमा उपचाररत छिन्।

प्रारम्भिक अनुसन्धानले परिवारभित्र लामो समयदेखि जग्गा–जमिनसम्बन्धी विवाद चल्दै आएको देखाएको छ। सोही तनावका कारण घटना भएको हुन सक्ने प्रहरीको अनुमान छ।

आक्रमणपछि आरोपी फरार भएका छन्। उनको खोजीका लागि जिल्ला र सीमावर्ती क्षेत्रमा प्रहरी परिचालन गरिएको छ। घटनाबारे थप अनुसन्धान जारी रहेको प्रहरीले जनाएको छ।