बसको ठक्करबाट दुई भारतीय पैदलयात्रीको मृत्यु

काठमाडौं । बसको ठक्करबाट पैदल हिडिरगेका दुई भारतीय नागरिकको मृत्यु! भएको छ।  काठमाडौँ महानगरपालिका–१२ भोटेबहालमा कालिमाटीबाट त्रिपुरेश्वरतर्फ जाँदै गरेको प्रदेश–३–०१–००५ ख ९२९८ नम्बरको बसले ठक्कर दिँदा गम्भीर घाइते भएका उनीहरुको मृत्यु भएको प्रहरीले जानकारी दिएको छ।

प्रहरीका अनुसार मृत्यु हुनेमा टेकु बस्दै आएका भारतीय नागरिक ४५ वर्षीय पदम उपाध्याय र ३७ वर्षीय सतिसकुमार कुसवाह रहेका छन्। दुवै जनालाई दुर्घटनापछि तत्काल उपचारका लागि  ट्रमा सेन्टरमा लगिएको थियो। अस्पताल पुर्‍याइएको भए पनि बचाउन नसकिएको प्रहरीले जनाएको छ।

दुर्घटनामा संलग्न बस चालक दोलखा घर भई हाल कपन बस्ने ३५ वर्षीय मानबहादुर बस्नेतलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको प्रहरीले जानकारी दिएको छ।