ट्रकको ठक्करबाट गम्भीर घाइते भएका इन्स्पेक्टर अभय लामाको निधन

काठमाडौं । काठमाडौँको तारकेश्वर नगरपालिकामा भएको सवारी दुर्घटनामा परेका प्रहरी निरीक्षक अभय लामाको उपचारका क्रममा निधन भएको छ। उनको ललितपुरस्थित बिएण्डबी अस्पतालमा उपचार हुँदै गर्दा ज्यान गएको हो।

चैत २९ गते तारकेश्वर–८ डाँडागाउँमा उनले चलाएको बागमती प्रदेश–०२–०२९ प ९४१५ नम्बरको मोटरसाइकललाई बागमती प्रदेश–०३–००१ ख १७१५ नम्बरको ट्रकले ठक्कर दिएको थियो। दुर्घटनापछि गम्भीर घाइते भएका लामाको दायाँ खुट्टाको नशा चुँडिनुका साथै टाउको र छातीमा समेत चोट लागेको थियो।

हाल उनको शव बिएण्डबी अस्पतालमै राखिएको छ। विदेशमा रहेका परिवारका सदस्यहरू नेपाल आएपछि मात्रै शव हस्तान्तरण गरिने उपत्यका ट्राफिक प्रहरी कार्यालयका एसएसपी नवराज अधिकारीले जानकारी दिएका छन्।

प्रहरी निरीक्षक लामा रामेछापको लिखु तामाकोशी गाउँपालिका–४ का बासिन्दा हुन्। उनी कार्यालयको काम सकेर फुुटुङस्थित डेरातर्फ जाँदै गर्दा दुर्घटनामा परेका थिए।

दुर्घटनामा संलग्न ट्रक चालक मकवानपुरको मनहरी गाउँपालिका–५ निवासी ३८ वर्षीय आईत राम मोक्तानलाई प्रहरीले नियन्त्रणमा लिएर अनुसन्धान अघि बढाएको छ।

२०७२ सालमा प्रहरी जवानका रूपमा सेवा सुरु गरेका लामाले पछि खुला प्रतिस्पर्धामार्फत प्रहरी सहायक निरीक्षक र २०७७ सालमा प्रहरी निरीक्षक पदमा उन्नति हासिल गरेका थिए।