सल्यान गाडी दुर्घटनामा ज्यान गुमाउनेको संख्या चार पुग्यो

सल्यान । सल्यानको बनगाड कुपिण्डे नगरपालिका–८ अन्तर्गत पर्ने पुथाला क्षेत्रमा जन्ती बोकेको जिप दुर्घटना हुँदा ज्यान गुमाउनेको संख्या चार पुगेको छ। सबै मृतक सोही वडाका स्थानीय बासिन्दा रहेको पुष्टि भएको छ।

दुर्घटनापछि घाइते अवस्थामा रहेका ३० वर्षीय मनबहादुर थापाको मेहेलकुना अस्पतालमा उपचारका क्रममा मृत्यु भएपछि मृतकको संख्या चार पुगेको जिल्ला प्रहरी कार्यालय सल्यानले जनाएको छ। यसअघि ५० वर्षीय टोपबहादुर थापा, ५० वर्षीय ठगे घर्ती र २९ वर्षीय कर्णबहादुर पुनको घटनास्थलमै ज्यान गएको थियो।

शनिबार साँझ कालीमाटीको लक्ष्मीपुरतर्फ जन्ती लिएर जाँदै गरेको लु-प्र-०१००१ ज ०२७१ नम्बरको जिप अनियन्त्रित भई दुर्घटनामा परेको हो। जिपमा कुल १८ जना सवार रहेको र तीमध्ये १४ जना घाइते भएको जनाइएको छ।

घाइतेहरूलाई तत्काल उद्धार गरी सुर्खेतस्थित मेहेलकुना अस्पताल लगिएको थियो। तीमध्ये केहीको नर्सिङ होम र न्युरो अस्पतालमा उपचार भइरहेको छ भने अन्यलाई थप उपचारका लागि बाँके पठाइएको प्रहरीले जानकारी दिएको छ।