बिरामीको मृत्युपछि भेरी अस्पतालमा तनाव, मेसुमाथि आक्रमणको प्रयास,'के भन्छ अस्पताल?'

बाँके । भेरी अस्पतालमा उपचाररत एक बिरामीको मृत्यु भएपछि अस्पताल परिसरमा तनावपूर्ण अवस्था सिर्जना भएको छ। घटनापछि मृतकका आफन्त र अस्पतालबीच विवाद चुलिँदा अस्पताल प्रशासनले प्रेस नोट जारी गर्दै घटनाबारे स्पष्टिकरण दिएको छ।

बैजनाथ–६, बाँके निवासी ६२ वर्षीया एक महिला पेट तथा छातीसम्बन्धी समस्या लिएर २०८३ वैशाख ६ गते अस्पतालमा भर्ना भएकी थिइन्। उनलाई APD (ग्यास्ट्राइटिस) Hypothyroidism, Hypertension तथा Type 2 Diabetes Mellitus  जस्ता दीर्घरोगहरू समेत रहेको अस्पतालले जनाएको छ।

उपचारका क्रममा मुटुसम्बन्धी जटिलताको सम्भावना देखिएपछि कार्डियोलोजिस्टको निरन्तर निगरानीमा राखी इसिजी, इको तथा कार्डियाक इन्जाइम लगायतका परीक्षणहरू गरिएको थियो। बहुविधागत चिकित्सकीय टोलीमार्फत उपचार जारी राखिए पनि रोगको स्पष्ट निदान हुन नसकेको अवस्थामा थप “क्रस ओपिनियन” का लागि २०८३ वैशाख ११ गते बिरामीलाई अन्यत्र रिफर गरिएको थियो। तर बिरामीको अवस्थामा केही सुधार देखिएपछि पुनः अस्पतालमै उपचार जारी राखिएको थियो।

तर, २०८३ वैशाख १३ गते उपचारकै क्रममा बिरामीको अवस्था अचानक गम्भीर बनेपछि उनको मृत्यु भएको अस्पतालले जनाएको छ।

मृत्युपछि सोही दिन अस्पताल प्रशासन र मृतकका आफन्तबीच छलफल भएको थियो। त्यसपछि २०८३ वैशाख १४ गते अस्पताल प्रमुख, विभागीय प्रमुखहरू तथा सरोकारवाला व्यक्तिहरूको उपस्थितिमा पुनः छलफल गरिएको थियो। उक्त छलफलमा चिकित्सकीय प्रक्रियाको सीमितता र जटिल अवस्थाका कारण यस्ता घटना हुन सक्ने विषयमा जानकारी गराइएको अस्पतालको भनाइ छ।

आज बिहान करिब साढे १० बजे मृतकका आफन्त तथा आफूलाई पत्रकार बताउने केही व्यक्तिहरू अस्पताल प्रमुखको कार्यकक्षमा प्रवेश गरी मेडिकल सुपरिन्टेन्डेन्ट डा. निराजन सुवेदीमाथि गालीगलौज, धम्की तथा हातपातको प्रयास गरेको अस्पतालले जनाएको छ।

त्यसैगरी प्रमुख कन्सल्टेन्ट फिजिसियन डा. राजन पाण्डेमाथि सामाजिक सञ्जालमार्फत धम्कीपूर्ण अभिव्यक्ति सार्वजनिक भएको भन्दै अस्पतालले गम्भीर आपत्ति जनाएको छ।

घटनापछि अस्पतालले “स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६” अनुसार कानुनी प्रक्रिया अघि बढाइएको जनाएको छ। घटनाले अस्पतालको सेवा प्रवाह तथा स्वास्थ्यकर्मीहरूको मनोबलमा असर परेको उल्लेख गर्दै अस्पतालले सबै पक्षलाई संयम रहन  आग्रह गरेको छ।