'भवन मात्र होइन, सेवा पनि सुधारिनुपर्छ” – प्रहरी महानिरीक्षक कार्की

नवलपुर। प्रहरी महानिरीक्षक दान बहादुर कार्कीले नवलपरासी पूर्व जिल्ला ट्राफिक प्रहरी कार्यालयको नवनिर्मित भवनहरूको उद्घाटन गरेका छन् ।  शनिबार आयोजित कार्यक्रममा उनले कार्यालय भवन, ब्यारेक, मेस लगायत संरचनाको उद्घाटन गर्नुका साथै परिसरको अवलोकन र वृक्षारोपण समेत गरेका छन् ।

कार्यक्रममा प्रहरी महानिरीक्षक कार्कीले भवन निर्माणमा सहयोग पुर्‍याउने व्यक्तिहरूलाई प्रशंसापत्र प्रदान गर्दै निर्माण कार्य समयमै सम्पन्न भएकोमा धन्यवाद व्यक्त गरे। उनले नवनिर्मित संरचनाबाट प्रदान गरिने सेवा अझै नागरिकमैत्री र व्यावसायिक हुनुपर्नेमा जोड दिए।

ट्राफिक व्यवस्थापनलाई प्रभावकारी बनाउन प्रविधिमैत्री प्रणालीको विकास आवश्यक रहेको उल्लेख गर्दै उनले नागरिकले प्रत्यक्ष रूपमा अनुभूति गर्ने गरी सेवा प्रवाह गर्न निर्देशन दिएका छन् । साथै दुर्घटना न्यूनीकरणलाई प्राथमिकतामा राख्दै जनचेतनामूलक कार्यक्रम सञ्चालन गर्न र ट्राफिक नियमको पूर्ण पालना गर्न नागरिकहरूलाई आग्रह गरे।

उनले नवनिर्मित भवनलाई प्रहरी र नागरिकको साझा सम्पत्ति भन्दै यसको संरक्षणमा सबैको समान दायित्व रहेको बताउँदै शिष्ट, अनुशासित र सेवामुखी व्यवहार प्रदर्शन गर्न प्रहरी कर्मचारीलाई निर्देशन दिएका हुन् । उनले भने-भवन मात्र होइन, सेवा पनि सुधारिनुपर्छ।'

उक्त भवन गण्डकी प्रदेश सरकारको करिब ३ करोड २ लाख रुपैयाँभन्दा बढी लागतमा निर्माण सम्पन्न भएको हो।