ल्याण्डिङ गर्ने क्रममा त्रिभुवन अन्तर्राष्ट्रिय विमानस्थलमा टर्किस एयरको जहाजमा आगलागी

काठमाडौँ । टर्किस एयरको जहाज त्रिभुवन अन्तर्राष्ट्रिय विमानस्थलमा अवतरण गर्ने क्रममा चक्काबाट आगो निस्किएको घटना भएको छ । इस्तानबुलबाट काठमाडौँ आएको टीके–७२६ कलसाइनको विमान ल्याण्डिङ गर्ने क्रममा चक्कामा समस्या देखिएपछि आगलागी भएको विमानस्थल सुरक्षा कार्यालयले जनाएको छ ।

विमानस्थल सुरक्षा कार्यालयका अनुसार सूचना प्राप्त हुनासाथ दमकलसहितको फायर फाइटरको टोली परिचालन गरिएको थियो । फायर फाइटरको टोलीले केही समयमै आगो नियन्त्रणमा लिएको र घटनामा कुनै मानवीय क्षति नभएको प्रहरीले जनाएको छ। 

प्रहरीका अनुसार विमानमा रहेका सबै यात्रु तथा चालक दलका सदस्य सुरक्षित छन् । प्रारम्भिक विवरणअनुसार विमानमा २७८ यात्रु र ११ जना चालक दलका सदस्य सवार थिए । केही संयुक्त राष्ट्रसंघसँग सम्बन्धित कूटनीतिज्ञहरू समेत विमानमा रहेको जानकारी प्राप्त भएको छ ।

घटनापछि धावनमार्ग केही समयका लागि बन्द गरिएको छ । अहिले विमानलाई ट्याक्सी–वे तर्फ सार्ने प्रयास भइरहेको तथा त्यसपछि प्राविधिक परीक्षण गरिने विमानस्थल सुरक्षा कार्यालयले जनाएको छ ।

यसअघि पनि २०७१ सालमा सोही एयरकै विमान त्रिभुवन विमानस्थलमा दुर्घटनामा परेको थियो । उक्त घटनापछि विमानस्थल चार दिनसम्म अवरुद्ध बनेको थियो, यद्यपि त्यसबेला पनि मानवीय क्षति भएको थिएन ।