बाँकेको राँझा क्षेत्रमा सवारी चालकको लापसे जाँच: चालक र यात्रुसहित १४ जना पक्राउ

बाँके ।  बाँकेको नेपालगञ्ज उपमहानगरपालिकाको राँझा क्षेत्रमा गरिएको लागुपदार्थ सेवन (लापसे) जाँचका क्रममा १४ जना पक्राउ परेका छन् । सोमबार साँझ ५ बजेदेखि राति ८ बजेसम्म सवारीचालकलाई गरिएको लापसे जाँच मा  १४ सवारीचालकसहित यात्रु फेला परेको जिल्ला ट्राफिक प्रहरी कार्यालय बाँकेले जनाएको छ।

जिल्ला ट्राफिक प्रहरी कार्यालय बाँके र इलाका प्रहरी कार्यालय कोहलपुरले सञ्चालन गरिएको संयुक्त लापसे चेकिङमा सार्वजनिक तथा निजी सवारी चालक र सवारीमा सवार व्यक्तिहरुको लापसे जाँच  गरिएको थियो। जाँचका क्रममा २३ जनामध्ये १४ जना लापसे पोजेटिभ भेटिएको ट्राफिक प्रहरीले जनाएको छ।

पोजेटिभ देखिएकामध्ये ६ जना अटो रिक्सा चालक , एक जना मोटरसाइकल चालक , २ जना स्कुटर चालक , एक जना ईभी भ्यान चालक , एक जना बस चालक  तथा सवारीमा सवार ३ जना रहेको जिल्ला ट्राफिक प्रहरी कार्यालय बाँकेले जानकारी दिएको छ।

ट्राफिक प्रहरी कार्यालय बाँकेका अनुसार  लापसे पोजेटिभ देखिएका सबैलाई आवश्यक कारवाहीका लागि इलाका प्रहरी कार्यालय कोहलपुरको नियन्त्रणमा राखिएको  छ।