प्रहरी र सशस्त्रका आईजीपीलाई विभागीय कारबाही गर्न सिफारिस

काठमाडौं । राष्ट्रिय मानव अधिकार आयोगले भदौ २३ र २४ गते भएको जेनजी आन्दोलनका क्रममा भएको मानव अधिकार उल्लङ्घनबारे प्रतिवेदन सार्वजनिक गर्दै राजनीतिक नेतृत्वदेखि सुरक्षा निकायका उच्च अधिकारीसम्मलाई जिम्मेवार ठहर गरेको छ।

आयोगले मानव अधिकार उल्लङ्घनमा संलग्न ठहर गरिएका व्यक्तिहरू हाल जुनसुकै सार्वजनिक पदमा रहे पनि कम्तीमा ६ महिनाका लागि निलम्बन गर्न सरकारलाई सिफारिस गरेको छ। साथै मानव अधिकारको सम्मान र संरक्षण सुनिश्चित गर्न आवश्यक निर्देशन दिन पनि आग्रह गरिएको छ।

प्रतिवेदनमा तत्कालीन प्रधानमन्त्री खड्गप्रसाद शर्मा ओली, तत्कालीन गृहमन्त्री रमेश लेखक र तत्कालीन सञ्चारमन्त्री पृथ्वी सुब्बा गुरुङलाई मानव अधिकार उल्लङ्घनमा जिम्मेवार राजनीतिक नेतृत्वका रूपमा उल्लेख गरिएको छ। साथै अभियन्ताको भूमिकामा रहेकी सुशीला कार्कीमाथि थप अनुसन्धान गर्न आयोगले सुझाव दिएको छ।

सुरक्षा तथा प्रशासनतर्फ तत्कालीन काठमाडौं प्रमुख जिल्ला अधिकारी छविलाल रिजाल, नेपाल प्रहरीका तत्कालीन एआईजी तथा हालका प्रहरी महानिरीक्षक दानबहादुर कार्की, प्रहरीका डीआईजी ओम विक्रम राणा, एसएसपी विश्व अधिकारी, सशस्त्र प्रहरीका तत्कालीन एआईजी तथा हालका सशस्त्र प्रहरी प्रमुख नारायणदत्त पौडेल, सशस्त्र प्रहरीका एसपी जीवन केसी तथा राष्ट्रिय अनुसन्धान विभागका तत्कालीन निर्देशक कृष्ण खनाललाई विभागीय कारबाहीका लागि सिफारिस गरिएको छ। आयोगले आन्दोलनका क्रममा बानेश्वर र संसद् भवन क्षेत्रमा खटिएका नेपाल प्रहरी, सशस्त्र प्रहरी र राष्ट्रिय अनुसन्धान विभागका फिल्ड कमाण्डरहरूलाई समेत जिम्मेवार ठहर गरेको छ।

प्रतिवेदनमा अवकाशप्राप्त प्रहरी महानिरीक्षक चन्द्र कुबेर खापुङ, अवकाशप्राप्त सशस्त्र प्रहरी महानिरीक्षक राजु अर्याल र राष्ट्रिय अनुसन्धान विभागका पूर्वप्रमुख हुतराज थापा लाई भविष्यमा सरकारी सेवाका लागि अयोग्य घोषणा गर्न तथा अभिलेख राख्न सिफारिस गरिएको उल्लेख छ।

आयोगले आन्दोलनका क्रममा भीड उत्तेजित पार्ने वा हिंसा भड्काउने भूमिकाबारे थप सूक्ष्म अनुसन्धान गर्नुपर्ने भन्दै विभिन्न अभियन्ता, सांसद, कलाकार र इन्फ्लुएन्सरहरूको नाम पनि उल्लेख गरेको छ। यस सूचीमा सुधन गुरुङ, गणेश कार्की, सुलभ खरेल, डा. तोषिमा कार्की, मनिष झा, हरि ढकाल, निश्चल बस्नेत, सिसन बानियाँ, आशिका तामाङ, भाग्य न्यौपाने, पुण्य गौतम, ज्वाला संग्रौला, दुर्गा प्रसाईं, हिमानी राज्य लक्ष्मी सिंह, भिम उपाध्याय, रवि किरण हमाल, भिक्टर पौडेल र निशान मैनाली रहेका छन्।