कारको ठक्करबाट सेनाका जवानको मृत्यु, अर्का एक घाइते

चितवन । चितवनमा मोटरसाइकल र कार ठोक्किँदा नेपाली सेनाका एक जवानको मृत्यु भएको छ।

जिल्लास्थित भरतपुर महानगरपालिका-१ पोखरा बसपार्कमा कार र मोटरसाइकल ठोक्किँदा तनहुँको भानु नगरपालिका-१२ घर भएर हाल  नेपाली सेनाको नम्बर २ विपद् व्यवस्थापन गण रसौलीमा कार्यरत २७ वर्षीय जवान निगम नेपाली सार्कीको मृत्यु भएको चितवन प्रहरीले जानकारी दिएको छ ।

चितवन प्रहरीले दिएको जानकारीअनुसार सोही गणमा कार्यरत बन्दीपुर गाउँपालिका-३ घर भएका २६ वर्षीय दिनेश थापा गम्भीर घाइते भएका छन् । गए राति बसपार्कबाट रामनगरतर्फ गइरहेको कारले विपरीत दिशाबाट आइरहेको उनीहरू सवार मोटरसाइकललाई ठक्कर दिएको थियो ।

दुर्घटनामा घाइते दुवै जनाको चितवन मेडिकल कलेजमा उपचार भइरहेको थियो । उपचारका क्रममा जवान सार्कीको मृत्यु भएको  प्रहरीले जानकारी दिएको छ।