ट्रकसँग स्कुटर ठोक्किँदा गम्भीर घाइते दुई युवकको मृत्यु

काठमाडौं । ट्रकसँग स्कुटर ठोक्किँदा दुई युवकको मृत्यु भएको छ। चितवनको भरतपुर महानगरपालिका–१५ स्थित अतिथि पार्टी प्यालेस नजिक भएको सवारी दुर्घटनामा दुई युवकको मृत्यु भएको प्रहरीले जानकारी दिएको छ।

प्रहरीका अनुसार भरतपुरबाट रामपुरतर्फ गइरहेको ना ५ ख ५८१६ नम्बरको ट्रकको पछाडिको भागमा सोही दिशातर्फ गुडिरहेको बाप्र ०६–००४ प ७२४८ नम्बरको स्कुटर ठोक्किएको थियो।

दुर्घटनामा स्कुटर चालक भरतपुर–२६ दिव्यनगरका २२ वर्षीय अशोक भण्डारी र पछाडि सवार लमजुङका स्थायी बासिन्दा तथा हाल भरतपुर–२० मा बस्दै आएका १९ वर्षीय राजिब गुरुङ गम्भीर घाइते भएका थिए। उनीहरूलाई तत्काल उपचारका लागि अस्पताल लगिएको भए पनि उपचारकै क्रममा आज बिहान  मृत्यु भएको प्रहरीले जनाएको छ।

घटनापछि ट्रक चालक मकवानपुरको राक्सिराङ गाउँपालिका–३ निवासी २७ वर्षीय बाबुलाल थोकरलाई प्रहरीले नियन्त्रणमा लिएको छ। दुर्घटनाको कारण र अन्य पक्षबारे थप अनुसन्धान भइरहेको प्रहरीको भनाइ छ।