प्रधानमन्त्रीको सचिवालय सदस्य भन्दै सरकारी गाडीमा अनुगमन, अनि पक्राउ परे सुजन

काठमाडौं । राष्ट्रिय स्वतन्त्र पार्टी (रास्वपा) को केन्द्रीय सदस्य तथा प्रधानमन्त्री बालेन शाहको सचिवालय सदस्य भएको दाबी गर्दै सरकारी कार्यालय अनुगमनमा हिँड्ने झापाका एक युवक पक्राउ परेका छन्।

पक्राउ पर्नेमा हल्दिबारी गाउँपालिका–१ का २६ वर्षीय सुजन विश्वकर्मा रहेका छन्। सरकारी कार्यालय, शैक्षिक संस्था तथा संघसंस्थामा दबाब र धम्कीपूर्ण व्यवहार गरेको आरोपमा उनलाई प्रहरीले नियन्त्रणमा लिएको हो।

विश्वकर्माले आफू रास्वपाको नेता र प्रधानमन्त्रीको सचिवालयमा कार्यरत रहेको बताएपछि विभिन्न सरकारी निकायमा पहुँच बनाएको प्रहरीको भनाइ छ। जिल्ला प्रशासन कार्यालयबाट अनुगमनका लागि सरकारी गाडीसमेत उपलब्ध गराइएको खुलेको छ।

हल्दिबारी गाउँपालिकामा अनुगमन गरेर फर्किएपछि उनको गतिविधिमाथि शंका लागेर प्रहरीले अनुसन्धान अघि बढाएको थियो। त्यस क्रममा उनी रास्वपाको केन्द्रीय सदस्य नरहेको र प्रधानमन्त्रीको सचिवालयमा पनि कार्यरत नभएको खुलेपछि पक्राउ गरिएको प्रहरीले जनाएको छ।

जिल्ला प्रहरी कार्यालय झापाका प्रहरी निरीक्षक मुन्नाकुमार अधिकारीका अनुसार विश्वकर्मामाथि पाँच दिनको म्याद थप गरी अनुसन्धान भइरहेको छ।

प्रहरीले उनको परिचयका कारण कसैलाई हानिनोक्सानी पुगेको वा लाभ लिएको भए सम्पर्क गर्न आग्रह गरेको छ। सरकारी गाडी प्रयोगबारे पनि अनुसन्धान भइरहेको प्रहरीले जनाएको छ।