काठमाडौं आइपुगे भारतीय स्थल सेनाध्यक्ष उपेन्द्र द्विवेदी

काठमाडौं । भारतीय स्थल सेनाध्यक्ष उपेन्द्र द्विवेदी  काठमाडौं आइपुगेका छन् । उनी आज दिउँसो त्रिभुवन अन्तर्राष्ट्रिय विमानस्थलमा अवतरण गरेको नेपाली सेनाले जनाएको छ।

नेपाल र भारतले एकअर्का देशका सेनाप्रमुखलाई मानार्थ महारथीको सम्मान दिने प्रचलन रहेकाले सोही दर्जा ग्रहणका लागि द्विवेदी नेपाल आएका हुन्।

राष्ट्रपति पौडेलले उनलाई भोलि मानार्थ महारथीको दर्जा प्रदान कार्यक्रम रहेको छ। मंसिर ९ गतेसम्म नेपालमै रहने द्विवेदीले राष्ट्रपतिसहित, प्रधानमन्त्री, रक्षामन्त्री  र नेपाली सेनाका प्रधानसेनापतिसँग औपचारिक भेटघाट गर्ने कार्यक्रम रहेको नेपाली सेनाले जनाएको  छ।

१ नोभेम्बर २०२४ मा २९ औं  भारतीय स्थल सेनाध्यक्षको जिम्मेवारी सम्हालेका द्विवेदीले आज सेनाका विभिन्न कार्यालयहरुको निरीक्षण गर्ने छन् । त्यस्तै उनले सेनाको पश्चिम पृतना मुख्यालयको समेत निरीक्षण गर्ने कार्यतालिका रहेको नेपाली सेनाले जनाएको छ।