इन्टरपोलबाट रेड नोटिस जारी भएका रुकुम पश्चिमका बस्मेत युएईबाट पक्राउ, मानव बेचबिखनको थियो मुद्दा

काठमाडौं। मानव बेचबिखन तथा ओसारपसार मुद्दामा इन्टरपोलबाट रेड नोटिस जारी भएका फरार प्रतिवादीलाई पक्राउ गरेर नेपाल ल्याइएको छ।

प्रहरी प्रधान कार्यालयका अनुसार इन्टरपोलको सहयोगमा कीर्तिपुर नगरपालिका-४ गाम्चा बस्ने रूकुम पश्चिम बाफिकोट गाउँपालिका-२ घर भएका कल बहादुर बस्नेतलाई युएईबाट पक्राउ गरिएको हो।

मानव बेचबिखन तथा ओसारपसार मुद्दामा संलग्न रही फरार रहेका उनलाई अन्तर्राष्ट्रिय स्तरमा खोजतलास एवम् पक्राउ गर्नको लागि एनसिबि काठमाडौंको अनुरोधमा इन्टरपोल महासचिवालयबाट २०८१ पुस ११ गते उनी विरूद्ध रेड नोटिस जारी भएको थियो । 

बस्नेतलाई सम्बन्धित कसूर बमोजिम कानूनी कारवाहीको लागि मानव बेचबिखन ब्यूरो पठाइएको प्रहरी प्रधान कार्यालयले जानकारी दिएको छ।