नेपालगञ्ज कारागारमा छन् क्षमता भन्दा दोब्बर कैदीबन्दी
नेपालगञ्ज । नेपालगञ्ज कारागारमा क्षमता भन्दा दोब्बर कैदीबन्दी राखिएको छ । ‘एडभोकेसी’ फोरम नेपाल, इन्सेक र उपभोक्ता संरक्षण मञ्च लुम्बिनी प्रदेशले संयुक्त रूपमा गरेको अनुगमनमा जेनजी प्रदर्शनपछि बाँके कारागारमा क्षमता भन्दा दोब्बर कैदीबन्दी राखिएको पाइएको हो ।
अनुगमन पश्चात् नेपालगञ्ज कारागारको अवस्था सुधार गरी कैदीबन्दीको उचित व्यवस्थापन गर्न आग्रह गरिएको छ । कारागारमा अहिले ३५० कैदीबन्दीको क्षमता रहेकामा ८०० कैदीबन्दी तथा थुनुवा राखिएको छ । यहाँ रहेका कैदीबन्दीमध्ये सबैभन्दा बढी लागुऔषध कारोबार, जबरर्जस्ती करणी, कर्तव्यज्यान मुद्दाका रहेका कारागार प्रशासनले जनाएको छ ।
कारागारका जेलर प्रकाश ढुङ्गानाले महिला कैदीबन्दी गृह नभएकाले बर्दिया कारागारमा पठाउने तयारी भइरहेको जानकारी दिए । जेनजी प्रदर्शनका क्रममा केही कैदीबन्दी भाग्न खोजेपछि सुरक्षाकर्मीले नियन्त्रणका लागि गोली चलाउँदा कैलालीका २४ वर्षीय उमेश बमको खुट्टामा गोली लागेर घाइते भएका उल्लेख गर्दै उनले बमको अवस्था सामान्य भएपछि पुनः कारागार फर्किएका बताए ।
क्षमता भन्दा दोब्बर बढी कैदीबन्दी बस्नुपर्ने अवस्था भएकाले बसोबास, स्वास्थ्य र सरसफाईमा कठिनाई देखिएपछि सुधारका लागि आग्रह गरिएको एडभोकेसी फोरमका प्रदेश संयोजक वसन्त गौतमले बताए । उनले कारागारमा अस्थायी रूपमा एक महिलाबन्दी राखिएको भए पनि बाँकेमा महिला कैदीबन्दीका लागि छुट्टै कारागार भवनको अभाव रहेको उल्लेख गरे ।
कारागारमा कैदीबन्दीका लागि पिउने पानी, सरसफाई र स्वास्थ्य उपचारको सामान्य सुविधा मात्र रहेको पाइएको अनुगमन टोलीले जनाएको छ । स्वच्छ पानीका लागि समरसेल र मिनरल वाटरको व्यवस्था गरिएको छ भने ए ब्लक र बी ब्लकमा गरी ११ वटा सार्वजनिक शौचालय सञ्चालनमा छन् ।
प्राथमिक तहको विद्यालय पनि सञ्चालनमा रहेको सो कारागारमा कक्षा १ देखि ५ कक्षासम्म ९८ जना कैदीबन्दीले अध्ययन गरिरहेका जेलर ढुङ्गानाले जनाकारी दिए ।
कारागारको प्रशासनिक भवन जीर्ण भएकाले कर्मचारीले असुरक्षित महसुस गर्दै बाहिरबाट काम गर्नुपर्ने अवस्था, अदालतबाट कैदीपुर्जी ढिलो प्राप्त हुने, पुनरावेदन म्याद ढिलाई हुने, कैदीबन्दीका उजुरी समयमा सम्बोधन नहुने लगायत समस्या समाधानका लागि कारागार प्रशासनलाई आग्रह गरिएको संयोजक गौतमले बताए ।
अनुगमनमा टोलीमा इन्सेकका कार्यक्रम अधिकृत टेकनाथ आचार्य, उपभोक्ता संरक्षण मञ्चका प्रदेश उपाध्यक्ष प्रभातकुमार ठकुरी लगायत सहभागी थिए ।रासस।
राप्ती सोनारीमा चाडपर्व लक्षित सुरक्षा व्यवस्था चुस्त बनाउन रास्वपाको माग
सोमबार, असोज ५, २०८३
१२ क्विन्टल बढी गाँजासहितको ट्रक सुरक्षा फौजको नियन्त्रणमा
बुधबार, भदौ २४, २०८३
जमुनाह नाकाबाट ४ सय ६४ नेपालीको उद्धार
बुधबार, भदौ २४, २०८३
नरैनापुरमा सीमा सुरक्षाबारे छलफल, ५०० रुपैयाँभन्दा बढीका सामानमा भन्सार अनिवार्य
मंगलबार, भदौ २३, २०८३- कोहलपुरको म्याक्स होटलमा प्रहरीको छापा, अनलाइन सट्टेबाजी, ४२ जना पक्राउ, विभिन्न उपकरण बरामद
- बाँके र बर्दियामा ब्राउन सुगरसहित तीन जना पक्राउ
- सुर्खेतमा श्रीमान्को फरुवा प्रहारबाट श्रीमतीको घटनास्थलमै मृत्यु
- पाल्हिनन्दनमा कुटपिटबाट घाइते युवकको उपचारका क्रममा मृत्यु, सुनिल पक्राउ
- बाँके प्रहरीको अपराध अनुसन्धानदेखि सुरक्षासम्मको प्रगति: १५२ मुद्दा दर्ता, १३७ प्रतिवादी पक्राउ
