इन्टरपोलको सहयोगमा जन्म कैद सजाय पाएका रेशम बहादुर दुबईबाट पक्राउ

काठमाडौँ । इन्टरपोलबाट रेड नोटिस जारी भएका एक जना फरार प्रतिवादी पक्राउ परेका छन् ।कर्तव्य ज्यान मुद्दामा इन्टरपोलबाट रेड नोटिस जारी भएका पर्वतका रेशम बहादुर रानालाई दुबईबाट पक्राउ गरिएको नेपाल प्रहरीले जानकारी दिएको छ।

प्रहरी प्रधान कार्यालयका अनुसार कर्तव्य ज्यान मुद्दामा पर्वत जिल्ला अदालतले रेशम बहादुरलाई २०६९ माघ १५ को फैसलाले दोषी ठहर गर्दै जन्म कैदको फैसला गरेको थियो।

अदालतको फैसला भए लगत्तै फरार भएका रेशम बहादुर दुबईमा रहेको जानकारी पाए पश्चात् इन्टरपोल नेपालले खोजतलास र पक्राउ गर्न अनुरोध गर्दै इन्टरपोल महासचिवालयमा पत्राचार गरेको थियो।

इन्टरपोल महासचिवालयले २०८१ जेठ १९ गते उनी विरुद्ध रेड नोटिस जारी गरेको प्रहरी प्रधान कार्यालयले जानकारी दिएको छ। रेशम बहादुरलाई एनसिबि अबुधाबी दुबईको समन्वयमा दुबईबाट पक्राउ गरेर आज नेपाल ल्याइएको प्रहरी प्रधान कार्यालयले जनाएको छ।

आज काठमाडौं ल्याइएका रेशम बहादुरलाई पर्वत पठाइएको प्रहरी प्रधान कार्यालयले जानकारी दिएको छ।