जेनजी आन्दोलनमा आपराधिक कार्य गरेकालाई सरकारले अविलम्ब कारबाही गर्नुपर्छ: सचिव विश्वकर्मा

बुटवल। नेकपा एमालेका सचिव तथा पूर्वमन्त्री छविलाल विश्वकर्माले जेनजी आन्दोलनमा आपराधिक गतिविधि गर्नेहरूलाई सरकारले अविलम्ब नियन्त्रणमा लिनुपर्ने बताएका छन्। 

आज बुटवलबाट बोल्दै विश्वकर्माले जेनजी आन्दोलनमा घुसपैठ हुँदै देशभर उत्पात मच्चाउने, सार्वजनिक तथा निजी सम्पत्तिमा क्षति पुर्‍याउने समूहहरूलाई सरकारले अझै जिम्मेवारीपूर्वक कारबाही नगरेको भन्दै असन्तुष्टि प्रकट गरेका छन् ।

उनका अनुसार जेलबाट फरार भएका कैदीहरू समेत अझै नियन्त्रणमा नआएको स्थिति गम्भीर चुनौती भएको छ। विश्वकर्माले प्रधानमन्त्री सुशीला कार्की र गृहमन्त्री ओमप्रकाश अर्यालले यसको जवाफ दिनु पर्ने बताउँदै सरकार प्रभावकारी रूपमा जिम्मेवारी पूरा गर्न नसकेको आरोप लगाए।

उनले भने, “जेनजी आन्दोलनमा घुसपैठ गरी गुण्डागर्दी गर्ने, आतंक फैलाउने र निजी तथा सार्वजनिक सम्पत्ति नष्ट गर्नेहरूलाई कानूनी कारबाहीको दायरामा ल्याउन सरकारले ढिलाइ गरिरहेको छ। देशभर हजारौँ कैदीहरू जेलबाट भागेका छन्, तर सरकारले के कदम चाल्यो भन्ने प्रश्न जनतासामु छ।”