खजुरामा लैङ्गिक हिंसाविरुद्धको १६ दिने अभियान

बाँके  । बाँकेको खजुरामा पनि लैङ्गिक हिंसा विरुद्धको १६ दिने अभियान–२०८२ सुरु भएको छ । खजुरा गाउँपालिका र इलाका प्रहरी कार्यालय धनौलीको संयुक्त आयोजनामा खजुरा गाउँपालिका परिसरमा दिप प्रज्वलन गरेर अभियानको उद्घाटन गरिएको हो। खजुरा गाउँपालिकाकी उपप्रमुख मन्जु मल्लले दियो बालेर अभियानको उद्घाटन गरेकी हुन् ।

सो क्रममा बोल्दै उनले नेपालमा अझै पनि कुप्रथा, विभेदपूर्ण सोच र सामाजिक बन्धनका कारण लैङ्गिक हिंसा सहन बाध्य रहेको भन्दै यस्तो समस्या अन्त्य गर्न परिवारदेखि समुदाय र सरकारी संयन्त्रसम्मको सक्रिय भूमिका आवश्यक रहेकोमा जोड दिइन । मल्लले लैङ्गिक समानता नीति निर्माण गरी सरकारले कार्यान्वयनमा ल्याइसकेको हुँदा महिला, बालबालिका तथा लैङ्गिक अल्पसंख्यकहरूको विकास, संरक्षण र सशक्तिकरणलाई प्राथमिकता दिएको उल्लेख गरिन।

प्रमुख प्रशासकीय अधिकृत दिलबहादुर पौडेलले १६ दिने अभियानले सबैलाई समानता, न्याय र सम्मानमा आधारित सभ्य, सुरक्षित र समुन्नत समाज निर्माणतर्फ अघि बढ्न प्रेरणा मिल्ने विश्वास लिएको बताए ।

कार्यक्रममा महिला बालबालिका तथा जेष्ठ नागरिक शाखा प्रमुख सुशीला न्यौपाने,इलाका प्रहरी कार्यालय धनौलीका प्रहरी वरिष्ठ नायब निरीक्षक लोकेन्द्र सिंह कार्की लगायतले महिला हिंसा न्यूनीकरण गर्न सबै महिला वर्गलाई आर्थिक पक्षबाट सबल गर्ने र गराउनेतर्फ सम्बन्धित पक्षले ध्यान दिनुपर्ने, लैङ्गिक विभेदरहित वातावरण सिर्जना गर्न आमनागरिकले आत्मबोध गर्नुपर्ने, समय समयमा हरेक परिवार, समाज, निकायका प्रतिनिधिहरूले महिला हिंसाविरुद्धको जनचेतनामूलक कार्यक्रमहरूमा अग्रसर हुनुपर्ने देखिएको बताएका थिए।

विश्वव्यापी रूपमा लैङ्गिकतामा आधारित हिंसा विरुद्ध १६ दिने अभियान वा छोटकरीमा १६ दिने अभियान मनाइन्छ । महिला विरुद्धको हिंसा उन्मुलनको अन्तर्राष्ट्रिय दिवस (नोभेम्बर २५) मा सुरु भई अन्तर्राष्ट्रिय मानव अधिकार दिवस (डिसेम्बर १०) का दिन यस १६ दिने अभियान समापन गर्ने गरिन्छ ।