इन्टरपोल रेड नोटिस जारी फरार प्रतिवादी जावेद अनवर दीन पक्राउ, युएईबाट नेपाल ल्याइयो

काठमाडौं । ठगी, आपराधिक विश्वासघात, आपराधिक लाभ (एक्सटर्सन) तथा संगठित अपराधसम्बन्धी मुद्दामा इन्टरपोलबाट रेड नोटिस जारी भएका फरार प्रतिवादी जावेद अनवर दीन पक्राउ परेका छन् ।

बागलुङ नगरपालिका–२, श्रीनगर घर भएका दीनलाई एनसिबि अबुधाबी (युएई) को समन्वयमा संयुक्त अरब इमिरेट्स (युएई) बाट पक्राउ गरी  नेपाल फिर्ता ल्याइएको हो । उनलाई सम्बन्धित मुद्दामा आवश्यक कारबाहीका लागि नेपाल ल्याइएको नेपाल प्रहरीले जनाएको छ ।

नेपाल प्रहरी प्रधान कार्यालय अपराध अनुसन्धान विभाग अन्तर्गत इन्टरपोल शाखाको अनुरोधमा इन्टरपोल महासचिवालयले २०७७ भदौ ८ गते दीनविरुद्ध रेड नोटिस जारी गरेको थियो । उनी उक्त मुद्दामा संलग्न रही लामो समयदेखि फरार रहेका थिए ।

पक्राउ परेका दीनलाई आवश्यक अनुसन्धान तथा कारबाहीका लागि केन्द्रीय अनुसन्धान ब्यूरो (सीआईबी) मा बुझाइएको नेपाल प्रहरी प्रधान कार्यालय इन्टरपोल शाखाले जानकारी दिएको छ ।