बर्दियाको गणेशपुरमा यसकारण गरेको थियो प्रहरीले कयौं राउन्ड हवाइ फायर......

बर्दिया  बर्दियामा आज बिहान एक घटनालाई लिएर स्थिति तनावग्रस्त बनेपछि प्रहरीले कयौं राउन्ड हवाइ फायर गरेको छ। सहोदर दाजुभाइको उपचारका क्रममा मृत्यु भएपछि आक्रोशित स्थानीयले हुलाकी राजमार्ग अवरुद्ध गरेका थिए। अवरोध हटाउन पुगेको प्रहरी टोलीमाथि स्थानीयले ढुंगा–मुढा प्रहार गरेपछि अवस्था झन् तनावपूर्ण बनेको हो।

ढुंगा प्रहारबाट ७ जना प्रहरी घाइते भएका छन्। स्थिति नियन्त्रणमा लिन प्रहरीले ४ राउन्ड हवाइ फायर गर्नुका साथै ९ राउन्ड अश्रुग्यास प्रहार गर्नुपरेको थियो। घाइतेमध्ये एक प्रहरी सहायक हवल्दारको अनुहारमा गम्भीर चोट लागेको छ र उनको बाँकेको कोहलपुरस्थित मेडिकल कलेजमा उपचार भइरहेको छ। एक जना प्रहरी निरीक्षकसहित अन्य घाइतेहरूको उपचार बर्दियामै भइरहेको छ।

तनावको मुख्य कारण गुलरिया नगरपालिका–११ गणेशपुरका ४० वर्षीय सुरेश खटिक र ३० वर्षीय बहोरण खटिकको मृत्यु हो। प्रहरीका अनुसार मदिरा सेवनपछि घरमै सुतेका उनीहरूमध्ये सुरेशलाई चैत ७ गते बिहान श्वासप्रश्वासमा समस्या देखिएपछि उपचारका लागि कोहलपुरस्थित नेपालगन्ज मेडिकल कलेज लगिएको थियो, जहाँ उनको बिहान करिब ५ बजे मृत्यु भयो। उनका भाइ बहोरणको पनि चैत ९ गते उपचारकै क्रममा मृत्यु भएको थियो।

दुवै दाजुभाइ चैत ६ गते भारततर्फको बजारमा गई मदिरा सेवन गरेर घर फर्किएको बताइएको छ। स्वास्थ्य अवस्था अचानक बिग्रिएपछि अस्पताल लगिए पनि बचाउन नसकिएको हो।

प्रहरीले घटनाबारे अनुसन्धान भइरहेको जनाएको छ। तर, स्थानीयले भने उनीहरूको मृत्यु भारतमा लागुऔषध सेवनका कारण भएको आशंका व्यक्त गरेका छन्। सीमा नाका व्यवस्थित गर्न र लागुऔषधको अवैध कारोबार पूर्ण रूपमा रोक्नुपर्ने माग गर्दै स्थानीयले गुलरिया–११ गणेशपुर चोकमा सडक अवरुद्ध गरी प्रदर्शन गरेका थिए। प्रहरीका अनुसार बिहान १० बजेपछि स्थिति नियन्त्रणमा आइसकेको छ।