सेन्ट्रल सिटी हस्पिटलले भन्यो-'भ्रामक प्रचारविरुद्ध आपत्ति छ', कारबाहीको माग (विज्ञप्तिसहित)

नेपालगञ्ज ।  नेपालगन्जस्थित सेन्ट्रल सिटी हस्पिटल एण्ड किरण प्रभा गुरु केयर रिसर्च सेन्टर प्रा.लि.ले हस्पिटलविरुद्ध भइरहेको भनिएको भ्रामक प्रचारप्रति आपत्ति जनाएको छ।

हस्पिटलले आइतबार जारी गरेको प्रेस विज्ञप्ति अनुसार सेन्ट्रल सिटी हस्पिटलले वि.सं. २०७२-७३ मा नेपालगञ्ज उपमहानगरपालिकाबाट १५ शैयाको अनुमति लिएर सेवा सुरु गरेको थियो। बिरामीको चाप बढ्दै गएपछि आवश्यक प्रक्रिया पूरा गरी प्रदेश सरकार स्वास्थ्य मन्त्रालयबाट वि.सं. २०८२ माघ १४ गतेदेखि लागू हुने गरी २५ शैयाको स्वीकृति प्राप्त गरी हाल गुणस्तरीय स्वास्थ्य सेवा प्रदान गरिरहेको जनाएको छ।

विज्ञप्तिमा हस्पिटल भवनको दक्षिणतर्फका छिमेकी तथा ध्वनि खबर मिडियाका सम्पादक उदय बहादुर श्रेष्ठसँग जग्गासम्बन्धी मुद्दा अदालतमा विचाराधीन रहेको र क्षतिपूर्ति सम्बन्धी अर्को मुद्दा जिल्ला प्रशासन कार्यालय बाँकेमा चलिरहेको उल्लेख गरिएको छ। सोही विषयलाई लिएर व्यक्तिगत रिसइबीका कारण श्रेष्ठले आफ्नो सञ्चारमाध्यममार्फत हस्पिटल तथा डा. दिपेश कुमार गुप्ताविरुद्ध तथ्यहीन र भ्रामक समाचार प्रकाशन गरी मानहानी गरिरहेको हस्पिटलको आरोप छ।

हस्पिटलले सर्वसाधारणलाई निरन्तर उत्कृष्ट स्वास्थ्य सेवा प्रदान गर्दै आएको दाबी गर्दै यस्ता भ्रामक प्रचारले संस्थाको प्रतिष्ठा र चिकित्सकको पेशागत छविमा नकारात्मक असर पारेको जनाएको छ।

विज्ञप्तिमार्फत हस्पिटल प्रशासनले सम्बन्धित निकायलाई गलत सूचना फैलाउने व्यक्तिविरुद्ध आवश्यक कानुनी कारबाही गर्न जोडदार माग गरेको छ।