अपरेशन सफल, तर बिरामीका सुनका गहना गायब:भेरी अस्पतालभित्रै चोरी काण्ड, कर्मचारी पक्राउ

नेपालगन्ज ।बाँकेको भेरी अस्पतालमा उपचारका क्रममा एक बिरामीका सुनका गहना अस्पतालकै कर्मचारीले चोरी गरेको घटना सार्वजनिक भएको छ।

बर्दियाको बढैयाताल गाउँपालिका–२ निवासी ५७ वर्षीया रती वली पित्तथैलीमा पत्थरीको समस्या लिएर वैशाख ५ गते अस्पताल भर्ना भएकी थिइन्। भोलिपल्ट गरिएको शल्यक्रिया सफल भएको अस्पतालले जनाएको छ। उनको पित्तथैलीबाट करिब ३२ एमएमको पत्थरी निकालिएको थियो।

शल्यक्रियाअघि बिरामीका शरीरमा रहेका धातुजन्य वस्तु हटाउने प्रक्रिया अनुसार वलीका कानमा रहेका सुनका मुन्द्रा निकाल्ने प्रयास गरिएको थियो। तर ती निकै कसिलो भएकाले निकाल्न नसकिएपछि टेपले बेरेर सुरक्षित राखिएको थियो।

अपरेसनपछि बिरामीलाई वार्डमा सारिएपछि उनका कानमा रहेका मुन्द्रा हराएको थाहा भयो। कुरुवा बसेकी उनकी १४ वर्षीया छोरीले गहना नदेखेपछि परिवारलाई जानकारी दिइन् र अस्पताल प्रशासनमा उजुरी गरियो।

घटनापछि प्रहरी बोलाएर अनुसन्धान सुरु गरिएको थियो। अस्पतालका सिसीटिभी फुटेज जाँच्दा एक अस्थायी कर्मचारी २२ वर्षीय विकास बाल्मिकि शंकाको घेरामा परे। प्रहरी अनुसन्धानका क्रममा उनले बिरामीलाई अपरेसन थिएटरबाट वार्डमा लैजाने क्रममा बीचमै मुन्द्रा निकालेर घर लगेको स्वीकार गरेका छन्।

प्रहरीका अनुसार बाल्मिकिले चोरी गरिएका गहना केही दिनपछि पुनः अस्पताल ल्याएका थिए। त्यसपछि उनलाई नियन्त्रणमा लिइएको हो।

अस्पताल प्रशासनले घटनाको पुष्टि भइसकेको भन्दै बाल्मिकिलाई सेवाबाट बर्खास्त गरेको छ। साथै, यस घटनामा थप अनुसन्धान गरी कानुनी प्रक्रिया अघि बढाइरहेको प्रहरीले जनाएको छ।