पेस्तोल देखाएर ज्वेलर्स लुट्ने प्रयास विफल, तीन जना पक्राउ

काठमाडौं।  ज्वेलर्स पसलमा पेस्तोल देखाएर लुटपाट गर्ने प्रयास गरिएको घटनामा प्रहरीले तीन जनालाई पक्राउ गरेको छ।

वैशाख १७ गते काठमाडौंको इन्द्रचोकस्थित नैना एन्ड इसन ज्वेलर्समा दुई जना व्यक्तिले  पेस्तोल तेर्साएर लुटपाटको प्रयास गरेको आरोपमा विकेश राजवाहक र अरूण भुजेललाई नियन्त्रणमा लिइएको जिल्ला प्रहरी परिसर काठमाडौंका एसपी पवनकुमार भट्टराईले जानकारी दिए। उनीहरूको साथबाट प्रहरीले एउटा पेस्तोल पनि बरामद गरेको छ।

यस घटनासँग सम्बन्धित अर्को एक व्यक्तिलाई काठमाडौं उपत्यका अपराध अनुसन्धान कार्यालयको टोलीले पक्राउ गरेको छ। पक्राउ पर्नेमा ललितपुर निवासी हरिकृष्ण महर्जन रहेका छन्।

घटनाको भिडियो सामाजिक सञ्जालमा सार्वजनिक भएको थियो, जसमा हेलमेट, नकाब र कालो पोशाक लगाएका दुई जना पसलभित्र प्रवेश गरेको देखिन्छ। भिडियोमा उनीहरूले पसलमा एक्लै रहेकी महिला कर्मचारीलाई पेस्तोल देखाएर लुटपाट गर्ने प्रयास गरेको देखिन्छ।

तर ती महिला कर्मचारीले साहसपूर्वक प्रतिकार गरेपछि उनीहरू भाग्न बाध्य भएका थिए। प्रहरीले उक्त दिन लुटपाट सफल नभएको जनाएको छ।

यसैबीच, नजिकैको अर्को पसलमा भएको चोरी घटनासँग पनि यस समूहको संलग्नता हुन सक्ने आशंकामा प्रहरीले थप अनुसन्धान अघि बढाइरहेको छ।