दिनदहाडै युवकमाथि खुकुरी प्रहार, गुल्मीका विपिन घिमिरेको मृत्यु

काठमाडौँ । दिनदहादै एक युवकको खुकुरी प्रहारबाट एक युवकको मृत्यु भएको छ।काठमाडौँको कीर्तिपुर नगरपालिका–१० स्थित पोडेटोल क्षेत्रमा खुकुरी आक्रमणमा परेर गुल्मी धुर्कोट गाउँपालिकाका विपिन घिमिरेको ज्यान गएको छ।

जिल्ला प्रहरी परिसर काठमाडौंका अनुसार तीन जनाको समूहले घिमिरेमाथि धारिलो हतियार प्रहार गरेको थियो।
गम्भीर घाइते भएका घिमिरेलाई उपचारका लागि देवढोका रहेको कीर्तिपुर अस्पताल पुर्‍याइएको भए पनि उपचारकै क्रममा मृत्यु भएको प्रहरीले जनाएको छ।

घटनामा संलग्न व्यक्तिहरू फरार रहेकाले उनीहरूको खोजी तीव्र बनाइएको प्रहरीको भनाइ छ। प्रहरीका अनुसार आक्रमणकारीहरूको पहिचान भइसकेको छ र उनीहरू यसअघि पनि विभिन्न मुद्दामा मुछिएका व्यक्तिहरू रहेको खुलेको छ।

प्रहरीले मृतक र आक्रमणमा संलग्न समूहबीच पहिलेदेखि नै चिनजान रहेको प्रारम्भिक अनुसन्धानबाट देखिएको जनाएको छ।