केपी ओली र रमेश लेखकलाई हाजिर जमानीमा छोड्ने निर्णय

काठमाडौं । पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई हाजिर जमानीमा रिहा गर्ने निर्णय गरिएको छ। सर्वोच्च अदालतको आदेशअनुसार जिल्ला प्रहरी परिसर काठमाडौंले उनीहरूलाई आजै छाड्ने तयारी गरेको जनाएको छ।

प्रहरीका अनुसार सरकारी वकिल कार्यालयको सहमतिमा दुवैलाई उनीहरूको नजिकका व्यक्तिको जिम्मामा बुझाइनेछ। भदौ २३ गतेको घटनासँग जोडिएको ज्यानसम्बन्धी कसुरमा उनीहरूमाथि अनुसन्धान भइरहेको थियो।

यसअघि उनीहरूलाई तेस्रो पटकसम्म हिरासत म्याद थप गरिएको थियो, जसको अवधि बुधबार राति सकिएको हो। त्यसपछि थप म्याद नलिने सर्वोच्च अदालतको परमादेश आएपछि रिहा गर्ने प्रक्रिया अघि बढाइएको हो।

चैत २३ गते सर्वोच्चका न्यायाधीशद्वयको इजलासले म्याद पुनः नथप्न निर्देशन दिएको थियो। यद्यपि, ओली र लेखकले गैरकानुनी थुनामा राखिएको दाबी गर्दै दायर गरेको बन्दी प्रत्यक्षीकरण रिट भने अदालतले खारेज गरेको थियो।

अदालतले अनुसन्धानका लागि दिइएको समयभित्रै आवश्यक प्रक्रिया टुंग्याउन र मुद्दा चलाउने वा नचलाउने निर्णय लिन सरकारी पक्षलाई निर्देशन दिएको थियो। तर अनुसन्धान पूरा नभएकाले तत्कालका लागि उनीहरूलाई हाजिर जमानीमा छाडिएको हो।

दुवै जनालाई प्रहरीले चैत १४ गते भक्तपुरबाट पक्राउ गरेको थियो। यसअघि जाँचबुझ आयोगले उक्त घटनाको अनुसन्धान गर्न सिफारिस गरेपछि मन्त्रिपरिषद्ले प्रतिवेदन कार्यान्वयन गर्ने निर्णय गरेको थियो।

सर्वोच्च अदालतले म्याद नथप्ने निर्णय गर्दा चार आधार प्रस्तुत गरेको थियो—पहिले नै पारिवारिक जिम्मेवारीमा छाडिएको अवस्था, दुवै जना शोकमा रहेको परिस्थिति, ओलीको स्वास्थ्य अवस्था र अस्पतालमा उपचाररत रहनु, तथा सरकारी वकिलद्वारा बयान लिइसकिएको तथ्य।