च्याउ टिप्न जाँदा सम्पर्कविहीन भएका १४ महिलाको सकुशल उद्धार

महेन्द्रनगर  । शुक्लाफाँटा राष्ट्रिय निकुञ्जभित्र च्याउ संकलन गर्न गएका र केही समयदेखि सम्पर्कविहीन रहेका महिलाहरू सकुशल भेटिएका छन्। उनीहरू अहिले परिवारको सम्पर्कमा आइसकेका छन्।

भीमदत्त नगरपालिका–१९ बागफाँटाका महिलाहरू गत आइतबारदेखि सम्पर्कविहीन भएपछि नेपाली सेना, नेपाल प्रहरी, सशस्त्र प्रहरी, नगर प्रहरी तथा निकुञ्ज प्रशासनले संयुक्त रूपमा खोजी अभियान सञ्चालन गरेका थिए।

शुक्लाफाँटा राष्ट्रिय निकुञ्जको सुरक्षामा खटिएको रणसिंह दल गणका गणपति प्रमुख सेनानी प्रकाश घिमिरेका अनुसार व्यापक खोजी अभियानकै क्रममा महिलाहरू सुरक्षित रहेको जानकारी प्राप्त भएको हो। उनले उनीहरू परिवारसँग सम्पर्कमा आइसकेको र सबैको अवस्था सामान्य रहेको बताए।

यसअघि बेल्डाँडी गाउँपालिका–२ का तीन जना महिला पनि निकुञ्जभित्र हराएका थिए। सहसेनानी सुमन जिसीको नेतृत्वमा खटिएको सेनाको टोलीले उनीहरूको खोजी गरी सोमबार बिहान सकुशल उद्धार गरेको थियो। उद्धारपछि उनीहरूलाई परिवारको जिम्मा लगाइएको जनाइएको छ।

निकुञ्जभित्र अनुमति बिना प्रवेश गरेका विभिन्न महिला समूह सम्पर्कविहीन भएपछि सुरक्षा निकाय र निकुञ्ज प्रशासनले समन्वयात्मक रूपमा खोजी अभियान सञ्चालन गरेका थिए। अहिले सम्पर्कविहीन भएका सबै महिलाहरू सुरक्षित रहेको पुष्टि भएको छ।