गाउँपालिकाले माग्यो तत्काल नरभक्षी बाघ मार्ने आदेश

सल्यान । लगातार एक साता भित्रै तीन जना स्थानीयको नरभक्षी बाघको आक्रमणबाट मृत्यु भएपछि गाउँपालिकाले बाघ मार्ने आदेश माग गरेको छ । सल्यानको कालिमाटी गाउँपालिकाका अध्यक्ष दानबहादुर खत्री केसीले डिभिजन वन कार्यालय खलंगा सल्यानमा पत्राचार गर्दै प्रचलित कानुन बमोजिम बाघ मार्ने आदेश तत्काल जारी गरिदिन आग्रह गरेका छन् ।

पुस २३ गते बाघले कालीमाटीको सीमा क्षेत्र सुर्खेत जिल्लाको भेरीगंगा नगरपालिका –५ गेरुवानीका ५७ वर्षीय गंगादेवी सारु मगर, पुस २५ गते कालिमाटी–७ की ४२ वर्षीया धनसरी रावत र पुस २९ गते कालीमाटी– ६ हात्तीढुंगाका ६६ वर्षीय चन्द्रबहादुर खप्तडीको बाघको आक्रमणबाट मृत्यु भएपछि अध्यक्ष खत्री केसीले बाघ मार्ने आदेश माग गरेका हुन ।

त्यस्तै बाँके राष्ट्रिय निकुञ्ज अन्तर्गतको बाँकेको राप्ती सोनारी गाउँपालिका – १ सौरीका स्थानीय ६१ वर्षीय मरिचमान भण्डारीको गाई वस्तु चराउन गएको समयमा पुस २१ गते बाघको आक्रमणबाट मृत्यु भएको थियो ।

हप्ता दिनमै बाँके, सुर्खेत र सल्यानमा गरि चार जनाको बाघको आक्रमणबाट ज्यान गुमाएका थिए ।

बाँके राष्ट्रिय निकुञ्ज तथा सोसंग सीमाना जोडिएका बस्तीमा बाघ प्रबेश गरि निरन्तर मानवीय तथा घर पालुवा पशु चौपायमा क्षति पुर्‍याउँदै आएको गम्भीर अवस्था रहेको हुँदा तत्काल बाघ मार्ने आदेश दिन उनले माग गरेका छन् ।

उल्लेखित घटनाहरुले ती क्षेत्रहरुमा मानवीय जीवन अत्यन्त जोखिमपूर्ण हुन पुगेको, स्थानीयमा त्रास सृजना हुनुका साथै असुरक्षित अवस्थामा धकलेको अध्यक्ष खत्री केसीले बताएका छन् ।

साथै उनले नागरिकको जीवन रक्षा गर्ने संवैधानिक दायित्व राज्यको भएपनि समस्याग्रस्त बाघलाई तत्काल मार्ने आदेश नभए थप मानविय क्षति हुने प्रबल संभावना रहेको भन्दै उनले बाघ मार्न अनुमति खोजेका छन् ।