विमानस्थल आसपासका क्षेत्रमा १ महिनासम्म निषेधाज्ञा जारी

काठमाडौं ।  त्रिभुवन अन्तर्राष्ट्रिय विमानस्थल परिसर र आसपासका क्षेत्रमा एक महिनाका लागि निषेधाज्ञा लागू गरिएको छ। केही समूह र राजनीतिक दलहरूले फागुन १ गते विमानस्थल र आसपास क्षेत्रमा प्रदर्शन गर्ने घोषणा गरेपछि सुरक्षा संवेदनशीलतालाई ध्यानमा राख्दै जिल्ला प्रशासन कार्यालय काठमाडौंले यस्तो निर्णय गरेको हो।

आजदेखि लागू भएको आदेशअनुसार विमानस्थल प्रवेशद्वारको ‘गोल्डेन गेट’देखि आन्तरिक तथा अन्तर्राष्ट्रिय टर्मिनल, पार्किङ क्षेत्र र सम्पूर्ण विमानस्थल हाताभित्र पाँच जनाभन्दा बढी व्यक्तिहरू एकत्रित भएर अनसन, धर्ना, जुलुस, घेराउ, प्रदर्शन वा सभा गर्न नपाइनेछ।

प्रमुख जिल्ला अधिकारी ईश्वरराज पौडेलद्वारा जारी आदेशमा विमानस्थलजस्तो संवेदनशील स्थानमा भीडभाडका कार्यक्रम हुँदा तोडफोड, आगजनी लगायतका अवाञ्छित गतिविधि हुन सक्ने जोखिम औंल्याइएको छ। सुरक्षा व्यवस्थालाई प्रभावकारी बनाउन र सार्वजनिक सम्पत्तिको संरक्षण गर्न निषेधाज्ञा आवश्यक भएको प्रशासनको भनाइ छ।

यद्यपि, आदेशमा निषेधित क्षेत्रबाहेकका स्थानमा संविधानले प्रत्याभूत गरेको शान्तिपूर्ण भेला र अभिव्यक्तिको अधिकारप्रति प्रशासन प्रतिबद्ध रहेको स्पष्ट पारिएको छ।

यसैबीच, पूर्वसूचना दिएर गरिने विरोध कार्यक्रमबाट सरकारी, सार्वजनिक वा निजी सम्पत्तिमा क्षति पुगेमा आयोजकबाट क्षतिपूर्ति असुल गरिने चेतावनी पनि प्रशासनले दिएको छ।